சுற்றுலா பயணிகளுக்கு சூப்பர் நியூஸ்; திருச்சியிலிருந்து பாங்காக்கிற்கு நேரடி விமான சேவை தொடக்கம்
செய்தி முன்னோட்டம்
திருச்சியில் இருந்து தாய்லாந்து நாட்டின் பாங்காக்கிற்கு தாய் ஏர்வேஸ் மற்றும் ஏர் ஏசியா நிறுவனங்கள் விமான சேவையை தொடங்கியுள்ளன.
திருச்சி பன்னாட்டு விமான நிலையத்தில் இருந்து மலேசியா, சிங்கப்பூர், ஐக்கிய அரபு எமிரேட்ஸ், இலங்கை உள்ளிட்ட பல நாடுகளுக்கும் ஏற்கனவே விமான சேவை இயக்கப்பட்டு வந்தன.
சமீபத்தில் புதிய விமான முனையம் திருச்சியில் திறக்கப்பட்ட பிறகு, இங்கிருந்து வெளிநாடுகளுக்கு இயக்கப்படும் விமானங்களின் எண்ணிக்கை அதிகரிக்கப்படும் எனக் கூறப்பட்டு வந்தது.
இந்நிலையில், சனிக்கிழமை (செப்டம்பர் 21) திருச்சியில் இருந்து பாங்காக்கிற்கு நேரடி விமான சேவை தொடங்கி வைக்கப்பட்டது.
இங்கிருந்து பாங்காக்கிற்கு செவ்வாய், வியாழன் மற்றும் சனி என வாரத்திற்கு மூன்று நாட்கள் இயக்கப்பட உள்ளது.
வாட்டர் சல்யூட்
விமான சேவை தொடக்கத்தை முன்னிட்டு வாட்டர் சல்யூட் நிகழ்வு
சனிக்கிழமை விமான சேவை தொடக்கத்தை முன்னிட்டு, திருச்சி விமான நிலையத்தில் தரையிறங்கிய முதல் விமானத்திற்கு விமான நிலைய ஆணையத்தின் குழுவின் சார்பில் வாட்டர் சல்யூட் அடித்து உற்சாக வரவேற்பு அளிக்கப்பட்டது.
இந்த விமானம் மேலே குறிப்பிட்டுள்ளபடி வாரத்தின் மூன்று நாட்களிலும், இரவு 10.35 மணிக்கு திருச்சி விமான நிலையத்திரு வந்தடைந்து, இரவு 11.05 மணிக்கு மீண்டும் பாங்காக் நோக்கி புறப்படும் என அறிவிக்கப்பட்டுள்ளது.
இந்நிலையில், சனிக்கிழமை பாங்காக்கில் இருந்து திருச்சி வந்த முதல் விமானத்தில் 46 பயணிகள் வந்தனர்.
மீண்டும் திருச்சியில் இருந்து விமானம் பாங்காக் கிளம்பியபோது, அதில் 176 பயணிகள் சென்றனர்.
இரு நாடுகளுக்குமான சுற்றுலாவை மனதில் வைத்து இந்த சேவை தொடங்கப்பட்டுள்ளது.