சென்னை, மதுரை, பொள்ளாச்சியில் சர்வதேச பலூன் திருவிழா: வரும் ஜனவரி 10-ஆம் தேதி துவக்கம்
செய்தி முன்னோட்டம்
தமிழகத்தின் சுற்றுலாத்துறை சார்பில், சர்வதேச பலூன் திருவிழா வரும் ஜனவரி 10ஆம் தேதி முதல் சென்னை, மதுரை மற்றும் பொள்ளாச்சி ஆகிய நகரங்களில் தொடங்குகிறது.
இந்த திருவிழாவில் உலகின் பல நாடுகளிலிருந்து வருகை தரும் ராட்சத பலூன்கள் பறக்கவிடப்படுகின்றன.
தமிழக அரசு மற்றும் தனியார் நிறுவனங்கள் கூட்டமைப்பில் ஆண்டுதோறும் இந்த திருவிழா பிரமாண்டமாக நடத்தப்படுகிறது.
இதில், வெளிநாடுகளில் இருந்து ராட்சத பலூன்கள் கொண்டு வரப்பட்டு, அவற்றில் பயணிக்கவும், அவற்றை காணவும் ஆயிரக்கணக்கான மக்கள் ஈர்க்கப்பட்டு, கூடுவது வழக்கம். அந்த வகையில் இது பத்தாவது ஆண்டாகும்.
இந்த ஆண்டில் 10-வது சர்வதேச பலூன் திருவிழா, தமிழக அரசின் சுற்றுலா துறை மற்றும் குளோபல் மீடியா பாக்ஸ் நிறுவனத்தின் ஒத்துழைப்புடன் நடைபெறுகிறது.
திருவிழா
சர்வதேச பலூன் திருவிழா மூன்று மாவட்டங்களில் ஏற்பாடு
பொதுவாக பொள்ளாச்சியில் மட்டும் நடைபெறும் இந்த விழா, இந்த ஆண்டு முதல் முறையாக சென்னை மற்றும் மதுரையிலும் நடைபெற உள்ளது.
இங்கிலாந்து, பிரான்ஸ், பிரேசில், பெல்ஜியம், ஜப்பான், தாய்லாந்து, வியட்நாம் உள்ளிட்ட நாடுகளில் இருந்து வெப்ப காற்று பலூன்கள் மற்றும் சிறுத்தை, ஓநாய், யானை உருவப் பலூன்களும் பறக்கவிடப்படுகின்றன.
இந்த விழா ஜனவரி 10 முதல் 12 வரை சென்னை கிழக்கு கடற்கரைச்சாலை கோவளத்தில், ஜனவரி 14 முதல் 16 வரை பொள்ளாச்சி ஆச்சிப்பட்டி ரைட் கொங்கு சிட்டியில், மற்றும் ஜனவரி 18 மற்றும் 19-ம் தேதிகளில் மதுரையில் கலைஞர் நூற்றாண்டு ஜல்லிக்கட்டு அரங்கத்தில் நடைபெறும் என அறிவிக்கப்பட்டுள்ளது.