சென்னை வரும் பிரதமர் மோடியினை சந்திக்கவுள்ளார் தமிழக முதல்வர் மு.க.ஸ்டாலின்
பிரதமர் மோடி அவர்கள் இன்று(ஏப்ரல்.,8)சென்னைக்கு வருகை தந்து ரூ.2,467கோடி மதிப்பில் கட்டப்பட்டுள்ள விமான முனையத்தினை சென்னை விமானநிலையத்தில் திறந்து வைக்கவுள்ளார். இவரது சென்னை பயணம் காரணமாக இன்று பல்வேறு போக்குவரத்து மாற்றங்கள் செய்யப்பட்டு, 5 அடுக்கு பாதுகாப்பும் போடப்பட்டுள்ளது. இவரை வரவேற்க தமிழக முதல்வர் மு.க.ஸ்டாலின், தமிழகஆளுநர் ஆர்.என்.ரவி, மத்திய மந்திரிகள் மற்றும் தமிழக அமைச்சர்கள் ஆகியோர் விமான நிலையம் செல்கிறார்கள். அவர் பங்கேற்கும் நிகழ்ச்சிகளிலும் இவர்கள் உடனிருப்பர் என்று செய்திகள் தெரிவிக்கிறது. பிரதமருக்கு எதிராக காங்கிரஸ் கட்சியினர் ஆர்ப்பாட்டத்தில் ஈடுபட வாய்ப்புள்ளதாக தகவல் வந்த நிலையில், அக்கட்சியின் பிரமுகர்களை காவல்துறை கண்காணிப்பு வளையத்திற்குள் வைத்துள்ளது. வாகனத்தணிக்கை மற்றும் இதர பாதுகாப்பு நடவடிக்கைகளை தமிழக டிஜிபி சைலேந்திர பாபு நேரடியாக செய்து வருகிறார்.
பல்வேறு புதிய திட்டங்களுக்கு அடிக்கல் நாட்டுகிறார் பிரதமர் மோடி
இந்நிலையில் சென்னை வரும் மோடியினை சந்திக்கவுள்ள தமிழக முதல்வர் மு.க.ஸ்டாலின் அவர்கள் மோடியிடம் கோரிக்கை மனு அளிக்கவுள்ளார் என்று கூறப்படுகிறது. அதன்படி அந்த மனுவில் நீட் தேர்வு விலக்கு, நிலக்கரி விவகாரம், ஆன்லைன் ரம்மி தடை மசோதா, தமிழக ஆளுநர் ஆர்.என்.ரவியின் செயல்பாடுகள் குறித்து எடுத்துரைக்கப்பட்டுள்ளது என்றும் தகவல்கள் தெரிவிக்கிறது. மேலும் ஸ்டாலின் அவர்கள் மோடி பங்கேற்கும், விமான நிலைய முனையம் திறப்பு விழா, வந்தே பாரத் ரயில் துவக்க விழா ஆகியவற்றில் உடன் இருப்பார் என்று கூறப்படுகிறது. தொடர்ந்து பல்லாவரம் அல்ஸ்டம் கிரிக்கெட் மைதானம் செல்லும் மோடி அங்கு மாலை 6.30-7.30 மணி வரை பல்வேறு புதிய திட்டங்களுக்கு அடிக்கல் நாட்டுகிறார். பணிகள் முடிக்கப்பட்ட திட்டங்களை திறந்தும் வைக்கிறார் என்பது குறிப்பிடத்தக்கது.
