திருநெல்வேலி பற்களை பிடுங்கிய விவகாரம் - முன்னாள் ஏஎஸ்பி பல்வீர் சிங் மீது வழக்குப்பதிவு
செய்தி முன்னோட்டம்
திருநெல்வேலி மாவட்ட அம்பாசமுத்திர உதவி காவல் துறை கண்காணிப்பாளராக பல்வீர் சிங் இருந்து வந்த நிலையில், அம்பாசமுத்திரம் கோட்ட காவல் துறையில் இவர் பொறுப்பேற்றார். இவர் காவல் நிலையத்திற்கு சிறிய குற்றங்களுக்காக விசாரணைக்கு அழைத்து வருவோரின் பற்களை பிடுங்கி தண்டனை அளித்து வருகிறார் என்று புகார்கள் தெரிவிக்கப்பட்டது. இதனையடுத்து பல்வீர் சிங் பதவி இடைநீக்கம் செய்யப்பட்டார். இதனை தொடர்ந்து, இந்த சம்பவம் தொடர்பாக மூத்த ஐஏஎஸ் அதிகாரி அமுதா விரிவான விசாரணையினை மேற்கொண்டார். பற்கள் பிடுங்கப்பட்டு பாதிக்கப்பட்ட 15 பேர் நேரில் ஆஜராகி வாக்குமூலம் அளித்துள்ளார்கள். இந்நிலையில் விசாரணை நடந்து கொண்டிருக்கும் நிலையில் குற்றச்சட்டுக்குள்ளான பல்வீர் சிங் மீது திருநெல்வேலி மாவட்ட குற்றப்பிரிவு காவல்துறை வழக்குப்பதிவு செய்துள்ளது என்று தகவல்கள் வெளியாகியுள்ளது.
கைது
பல்வீர் சிங்கின் கைது நடவடிக்கை குறித்த தகவல்
அதன்படி தற்போது கொடுங்காயங்களை ஏற்படுத்துதல், குற்றவியல் மிரட்டல், மரணத்தினை விளைவிக்கும் வகையில் ஆயுதம் கொண்டு தாக்குதல் போன்ற ஜாமீன் கிடைக்காத பிரிவுகளின் கீழ் பல்வீர் சிங் மீது வழக்குப்பதிவு செய்யப்பட்டுள்ளது. இதனை தொடர்ந்து தற்போது முன்னாள் ஏஎஸ்பி அதிகாரியான பல்வீர் சிங்கை விரைவில் கைது செய்ய வேண்டும் என்று காவல்துறையிடம் மக்கள் கண்காணிப்பகம் அமைப்பின் ஒருங்கிணைப்பாளர் வழக்கறிஞர் ஹென்றி திபேன் தெரிவித்துள்ளார். இது குறித்து அவர் பேட்டியளித்துள்ள நிலையில், பல்வீர் சிங்கின் கைது நடவடிக்கை நிச்சயம் ஒரு எடுத்துக்காட்டாக நிலைக்கும் என்று கூறியுள்ளார் என்பது குறிப்பிடத்தக்கது.