கருணை அடிப்படையிலான பணி நியமன விதிகளில் திருத்தம்; அரசாணை வெளியிட்டது தமிழக அரசு
செய்தி முன்னோட்டம்
தமிழ்நாடு அரசுப் பணியாளர்கள் விதிகள், 2023, கருணை அடிப்படையிலான பணி நியமனம் தொடர்பான விதிகள், சென்னை உயர் நீதிமன்றத்தின் உத்தரவின்படி திருத்தப்பட்டுள்ளன. இந்த திருத்தங்கள், அரசாணையாக வெளியிடப்பட்டுள்ளன. திருத்தத்தின் நோக்கம், பணி நியமன நடைமுறைகளை வெளிப்படையானதாகவும், வேகமானதாகவும் மாற்றுவதே ஆகும். இந்த திருத்தத்தின் மூலம், இதுவரை மாவட்ட வாரியாகப் பராமரிக்கப்பட்டு வந்த பதிவு மூப்புப் பட்டியல், இனி மாநில அளவில் ஒரே பட்டியலாகப் பராமரிக்கப்படும். இதனால், தகுதியுள்ள அனைத்து விண்ணப்பதாரர்களுக்கும் நியாயமான வாய்ப்பு கிடைக்கும். மேலும், ஏற்கனவே நிலுவையில் உள்ள விண்ணப்பங்களும் இந்தப் புதிய பட்டியலில் சேர்க்கப்படும்.
காலக்கெடு
ஆன்லைன் விண்ணப்பம் மற்றும் காலக்கெடு
கருணை அடிப்படையிலான பணி நியமனங்களுக்கான விண்ணப்பங்கள் இனி ஆன்லைன் போர்ட்டல் வழியாக மட்டுமே பெறப்படும். அரசு ஊழியர் இறந்த தேதியிலிருந்து மூன்று ஆண்டுகளுக்குள் விண்ணப்பம் செய்ய வேண்டும். காலிப் பணியிடங்களின் அடிப்படையில், இந்த நியமனங்கள் ஒரு குறிப்பிட்ட காலக்கெடுவுக்குள், அதாவது மூன்று ஆண்டுகளுக்குள் முடிக்கப்படும்.
தகுதிகள்
விண்ணப்பிப்பதற்கான தகுதிகள் மற்றும் வயது வரம்பு
இறந்த அரசு ஊழியரின் குடும்பத்தில், அவரது மனைவி/கணவர், மகன், மகள், தத்து மகன்/மகள் ஆகியோர் விண்ணப்பிக்கலாம். திருமணம் ஆகாத அரசு ஊழியர் இறந்தால், அவரது சகோதரர்களுக்கும் பணி வாய்ப்பு உண்டு. விண்ணப்பதாரரின் கல்வித் தகுதியின் அடிப்படையில், பெரும்பாலும் குரூப் சி அல்லது டி பிரிவுகளில் பணி வழங்கப்படும். குடும்பத்தில் வேறு யாரும் அரசுப் பணியில் இருக்கக்கூடாது என்பது ஒரு முக்கிய நிபந்தனையாகும். இந்த திருத்தங்கள், கருணை அடிப்படையிலான பணி நியமன நடைமுறையில் உள்ள சிக்கல்களைத் தீர்த்து, பொருளாதார ரீதியாக பாதிக்கப்படும் குடும்பங்களுக்கு விரைவான உதவியை உறுதி செய்யும் என எதிர்பார்க்கப்படுகிறது.