ரேணுகாசாமி கொலை வழக்கு: கன்னட நடிகர் தர்ஷனுக்கு ஜூலை 4-ம் தேதி வரை நீதிமன்ற காவல்
செய்தி முன்னோட்டம்
ரேணுகாசாமி கொலை வழக்கில் கன்னட நடிகர் தர்ஷன் தூகுதீபா மற்றும் மற்ற மூன்று குற்றவாளிகளையும் ஜூலை 4-ம் தேதி வரை நீதிமன்ற காவலில் வைக்க உத்தரவு பிறப்பிக்கப்பட்டுள்ளது.
தர்ஷனின் ரசிகரான ரேணுகாசாமியின் கொடூரமான கொலை தொடர்பாக நடந்து வரும் விசாரணையின் இந்த சமீபத்திய தகவலை சிறப்பு அரசு வழக்கறிஞர் (SPP) பிரசன்ன குமார் வழங்கியுள்ளார்.
இன்று சிறப்பு அரசு வழக்கறிஞர் குற்றம் சாட்டப்பட்டவர்களைக் காவலில் வைக்கக் கோரவில்லை. எனினும், அந்த நான்கு குற்றவாளிகளையும் நீதிமன்றக் காவலில் வைக்க உத்தரவு பிறப்பிக்கப்பட்டது.
தர்ஷன், பிரதோஷ், வினய், தன்ராஜ் ஆகியோரை பரப்பன அக்ரஹாரா மத்திய சிறையில் அடைக்க நீதிமன்றம் உத்தரவிட்டுள்ளது.
அவர்கள் ஜூலை 4ம் தேதி வரை 14 நாட்கள் நீதிமன்ற காவலில் இருப்பார்கள்.
கர்நாடகா
ரேணுகாசாமியை கொடூரமாக கொலை செய்த அவலம்
33 வயதான ரேணுகாசாமி என்பவரை கொலை செய்ததாக தர்ஷன் ஜூன் 11 அன்று கைது செய்யப்பட்டார்.
இந்த வழக்கில் கைது செய்யப்பட்ட தர்ஷனின் சக நடிகரும் தோழியுமான பவித்ரா கவுடாவுக்கு தர்ஷனின் ரசிகரான ரேணுகாசாமி ஆபாசமான மெசேஜ்களை அனுப்பியதாக கூறப்படுகிறது.
அதனால் கோபமடைந்த தர்ஷன், தனது ரசிகர் மன்ற உறுப்பினரை அனுப்பி ரேணுகாசாமியை கொலை செய்ய சொன்னதாக ஆதாரங்கள் கூறுகின்றன.
தர்ஷனின் ரசிகர் மன்றத்தைச் சேர்ந்த ராகவேந்திரா என்பவர், நடிகர் தர்ஷனுடனான சந்திப்புக்கு ஏற்பாடு செய்வதாகக் கூறி ரேணுகாசாமியை ஆர்ஆர் நகரில் உள்ள ஒரு கொட்டகைக்கு அழைத்து சென்றிருக்கிறார்.
அங்கு வைத்து ரேணுகாசாமி சித்திரவதை செய்யப்பட்டு கொல்லப்பட்டதாக கூறப்படுகிறது.