தங்கக் கடன் பத்திரங்களில் நாம் ஏன் முதலீடு செய்ய வேண்டும்?
செய்தி முன்னோட்டம்
முதலீட்டுக்காக தங்கம் வாங்குபவர்களா நீங்கள்? அப்படியானால் இந்தத் தகவல் உங்களுக்குத் தான். முதலீட்டுக்காகத் தங்கம் வாங்குபவர்களுக்கு, அதற்கு மாற்றாக அதிக நன்மைகளுடன் கூடிய தங்கக் கடன் பத்திரங்கள் வழங்கும் திட்டத்தை கடந்த 2015-ல் அறிமுகப்படுத்தியது ரிசர்வ் வங்கி.
இந்தத் திட்டத்தின் கீழ், நீங்கள் தங்கத்தை தங்கமாக வாங்காமல், தங்கப் பத்திரமாக வாங்கி முதலீடு செய்யலாம். வேறு என்னென்ன நன்மைகளைக் கொண்டிருக்கிறது இந்தத் தங்கக் கடன் பத்திரத் திட்டம்?
வருடத்திற்கு 2.5% வட்டி:
தங்கக் கடன் பத்திரத்தை நாம் வாங்கும் போது, தங்கமாக நாம் வாங்கும் போது கிடைக்கும் லாபத்துடன் கூடுதல் ஆண்டுக்கு நாம் முதலீடு செய்திருக்கும் மதிப்புக்கு 2.5% வட்டி வழங்கப்படுகிறது. ஆறு மாதத்திற்கு ஒரு முறை இந்த வட்டியானது வழங்கப்படும்.
முதலீடு
பாதுகாக்க வேண்டிய தேவையில்லை:
தங்கமாக நாம் வாங்கி முதலீடு செய்யும் போது, அதனை பாதுகாப்பாக வைத்திருக்கவும், பிற இடங்களுக்கு எடுத்துச் செல்லும் போது பாதுகாப்பாக எடுத்துச் செல்லவும் முயற்சி எடுக்க வேண்டும். ஆனால், தங்கக் கடன் பத்திரங்களில் அந்தப் பிரச்சினை இல்லை.
வரிவிலக்கு உண்டு:
எட்டு வருடங்கள் கழித்து முதிர்வடைந்த பிறகு நாம் திரும்பப் பெரும் தொகைக்கு நாம் வரி செலுத்தத் தேவையில்லை.
எளிதாக விற்கவோ அல்லது பரிமாற்றம் செய்யவோ முடியும்:
இந்தத் தங்கக் கடன் பத்திரங்களை பங்குச்சந்தையிலும் வர்த்தகம் செய்து கொள்ள முடியும். மேலும், உடனடி பணத் தேவைகளுக்கு தங்கத்தைப் போலவே இந்த தங்கக் கடன் பத்திரங்களையும் அடமானம் வைத்துப் பணம் பெற்றுக் கொள்ள முடியும்.