33 நிபந்தனைகளுடன் தமிழக வெற்றிக் கழக மாநாட்டிற்கு காவல்துறை அனுமதி
தமிழக வெற்றிக் கழகத்தின் முதல் மாநாட்டை விக்கிரவாண்டியில் நடத்த காவல்துறை 33 நிபந்தனைகளுடன் அனுமதி வழங்கப்பட்டுள்ளது. நடிகர் விஜய் தொடங்கியுள்ள அரசியல் கட்சியான தமிழக வெற்றிக் கழகத்தின் முதல் மாநாட்டை நடத்த திருச்சி, மதுரை, சேலம், ஈரோடு என பல பகுதிகளில் ஆய்வு செய்யப்பட்ட நிலையில், இறுதியில் விக்கிரவாண்டியில் நடத்த கட்சித் தலைமை முடிவு செய்தது. இதைத் தொடர்ந்து கட்சியின் பொதுச் செயலாளர் புஸ்ஸி ஆனந்த், கடந்த ஆகஸ்ட் 28ஆம் தேதி விக்கிரவாண்டி அடுத்த வி.சாலை பகுதியில் மாநாடு நடத்துவதற்கு அனுமதி கேட்டு விழுப்புரம் மாவட்ட ஆட்சியர் மற்றும் காவல் கண்காணிப்பாளரிடம் மனு அளித்தார். இதைத் தொடர்ந்து இடத்தை ஆய்வு செய்த மாவட்ட காவல்துறை, மாநாடு தொடர்பாக 21 கேள்விகளை எழுப்பி இருந்தது.
காவல்துறை அனுமதி
காவல்துறை எழுப்பிய அனைத்து கேள்விகளுக்கும் கடந்த ஆறாம் தேதி மாவட்ட காவல்துறையிடம் தமிழக வெற்றிக் கழக பொதுச்செயலாளர் புஸ்ஸி ஆனந்த் எழுத்துப்பூர்வமாக பதில் அளித்தார். இதைத் தொடர்ந்து ஞாயிற்றுக்கிழமை (செப்டம்பர் 8) மாநாட்டிற்கு அனுமதி வழங்கப்பட்டது. அதே நேரம், 33 நிபந்தனைகளும் விதிக்கப்பட்டுள்ளது. இதற்கான அனுமதிக்கான கடிதத்தினை கட்சியின் விழுப்புரம், கள்ளக்குறிச்சி மாவட்ட கட்சியின் பொறுப்பாளர் பரணிபாலாஜி விழுப்புரம் காவல்துணை கண்காணிப்பாளர் சுரேஷிடமிருந்து பெற்றுக்கொண்டார். இதில், தேசிய நெடுஞ்சாலை அருகே மாநாடு நடத்தப்படுவதால் போக்குவரத்துக்கு இடையூறு இல்லாமல் பார்த்துக் கொள்ள வேண்டும் என்றும், காவல்துறை அனுமதித்த இடங்களைத் தவிர மற்ற இடங்களில் வாகனங்களை நிறுத்தக்கூடாது போன்ற நிபந்தனைகள் விதிக்கப்பட்டுள்ளன.
