டெல்லியில் போலி மருத்துவர்களால் மரணமடைந்த நோயாளிகள் - பகீர் தகவல்
செய்தி முன்னோட்டம்
டெல்லி கிரேட்டர் கைலாஷ் பகுதியில் அமைந்துள்ளது அகர்வால் மருத்துவ மையம்.
இங்கு நீரஜ் அகர்வால், அவரது மனைவி பூஜா அகர்வால், மகேந்தர் சிங், ஜஸ்ப்ரீத் சிங் உள்ளிட்டோர் மருத்துவர்களாக பணியாற்றியுள்ளனர்.
கடந்த 2022ம் ஆண்டு இம்மருத்துவமனையில் அஸ்கர் அலி என்பவர் பித்தப்பை சிகிச்சைக்காக அனுமதிக்கப்பட்டுள்ளார்.
அவருக்கு மருத்துவர்.,ஜஸ்ப்ரீத் சிங் மூலம் அறுவை சிகிச்சை செய்யப்படும் என்று முதலில் கூறப்பட்டநிலையில், அவருக்கு பதில் பூஜாஅகர்வால், மகேந்தர் சிங் அறுவைச்சிகிச்சை செய்துள்ளனர்.
அறுவைச்சிகிச்சை முடிந்தவுடனேயே அஸ்கர்அலி கடுமையான வயிற்றுவலி ஏற்பட்டு துடித்துள்ளார்.
உடனே அவரை வேறு மருத்துவமனைக்கு அவரது உறவினர்கள் கொண்டு சென்றுள்ளனர்.
அங்கு அவரை பரிசோதித்த மருத்துவர்கள் அவர் இறந்துவிட்டதாக கூறியுள்ளனர்.
தவறான அறுவைச்சிகிச்சை காரணமாக தான் அஸ்கர் அலி உயிரிழந்ததாக புகார் அளிக்கப்பட்டது.
போலி மருத்துவர்கள்
போலி மருத்துவர்கள் 4 பேர் கைது
இப்புகாரின் பேரில் விசாரணை நடத்தப்பட்டதில் நீரஜ் அகர்வால், பூஜா அகர்வால், மகேந்தர் சிங், ஜஸ்ப்ரீத் சிங் உள்ளிட்ட 4 பேரும் கைது செய்யப்பட்டுள்ளனர்.
இதுகுறித்து பேசிய காவல்துறை, 2016ம்.,ஆண்டு முதல் இந்த மருத்துவமனை மீது குறைந்தபட்சம் 9 புகார்கள் உள்ள நிலையில், 7 புகார்கள் மீதான விசாரணையில் மருத்துவ அலட்சியம் காரணமாக நோயாளிகள் உயிரிழந்தது தெரியவந்தது.
இதனையடுத்து காவல்துறை சார்பில் ஓர் மருத்துவக்குழு மருத்துவமனையை ஆய்வு செய்துள்ளது.
அதில் நீரஜ் அகர்வாலை தவிர மற்றவர்கள் அனைவரும் போலி மருத்துவர்கள் என்பது தெரியவந்துள்ளது என்று கூறியுள்ளனர்.
மேலும் அந்த மருத்துவமனையிலிருந்து, தகுதியற்ற அறுவை சிகிச்சை கத்திகள், 47-வங்கிகளின் காசோலை புத்தகங்கள், 54 வெவ்வேறு வங்கிகளின் ஏ.டி.எம்.கார்டுகள், கிரெடிட்-கார்டு மெஷின்கள் உள்ளிட்டவை பறிமுதல் செய்யப்பட்டுள்ளது.