குடியரசுத் தலைவர் கையெழுத்திட்டார்; ஆன்லைன் சூதாட்ட தடை மசோதா சட்டமானது
செய்தி முன்னோட்டம்
ஆன்லைன் விளையாட்டு மேம்பாடு மற்றும் ஒழுங்குமுறை மசோதா, 2025 குடியரசுத் தலைவர் திரௌபதி முர்முவின் ஒப்புதலைப் பெற்றதன் மூலம் வெள்ளிக்கிழமை (ஆகஸ்ட் 22) சட்டமாக அமலுக்கு வந்தது. இந்த மசோதா மக்களவையில் புதன்கிழமையும், மாநிலங்களவையில் வியாழக்கிழமையும் நிறைவேற்றப்பட்டது. முன்னதாக, மசோதாவை தாக்கல் செய்த மத்திய மின்னணு மற்றும் தகவல் தொழில்நுட்பத் துறை அமைச்சர் அஸ்வினி வைஷ்ணவ், இது சமநிலையான அணுகுமுறை என்று விவரித்தார். இது மின்-விளையாட்டுகள் (e-sports) மற்றும் ஆன்லைன் சமூக விளையாட்டுகளை ஊக்குவிக்கும் அதேவேளையில், தீங்கு விளைவிக்கும் பண அடிப்படையிலான விளையாட்டுகளைத் தடை செய்கிறது. அமைச்சர் இந்த மசோதா, விளையாட்டுகளை மூன்று வகைகளாகப் பிரிக்கிறது என்று விளக்கினார். முதலாவதாக, மின்-விளையாட்டுகள் மற்றும் சதுரங்கம், சுடோகு போன்ற ஆன்லைன் சமூக விளையாட்டுகள் ஊக்குவிக்கப்படும்.
தடை
பணத்தை அடிப்படையாக கொண்ட விளையாட்டுகளுக்குத் தடை
இரண்டாவதாக, பணத்தை அடிப்படையாகக் கொண்ட ஆன்லைன் விளையாட்டுகள், சமூக மற்றும் நிதிப் பாதிப்புகளை ஏற்படுத்துவதால் தடை செய்யப்படும். இந்தச் சட்டம், ஆன்லைன் பண விளையாட்டுகளால் ஏற்படும் அடிமைத்தனம் மற்றும் நிதி இழப்புகளைக் கட்டுப்படுத்தும் என அஸ்வினி வைஷ்ணவ் கூறினார். ஆன்லைன் விளையாட்டுகளால் 45 கோடிக்கும் அதிகமான பயனர்கள் பாதிக்கப்பட்டுள்ளதாகவும், சுமார் ₹20,000 கோடிக்கு அதிகமான சேமிப்பு இழக்கப்பட்டுள்ளது என்றும் அவர் குறிப்பிட்டார். இந்த விளையாட்டுகள் மனநலப் பிரச்சினைகள், சட்டவிரோதப் பணப் பரிவர்த்தனை மற்றும் பயங்கரவாத நடவடிக்கைகளுடன் தொடர்புடையவை என்றும் அவர் குற்றம் சாட்டினார்.