நிபா வைரஸ்: இறந்தவரின் தோப்புக்குள் வௌவால்கள் காணப்படுவதாக தகவல்
கேரளாவின் கோழிக்கோடு மாவட்டத்தில், சென்ற வாரத்தில், கேரளாவின் கோழிக்கோட்டில், ஒருவருக்கு நிபா வைரஸ் இருப்பது முதல்முதலில் கண்டறியப்பட்டது. அதன் தொடர்ச்சியாக, இருவர் மரணமடைந்துள்ளனர், மேலும் ஒருவர் ஆபத்தான நிலையில் இருப்பதாக நேற்று கூறப்பட்டது. இன்றைய சுகாதாரத்துறையின் அறிக்கைப்படி, 6 நபர்களுக்கு நிபா வைரஸ் பாதிப்பு இருப்பது கண்டுபிடிக்கப்பட்டுள்ளது. இந்த நிலையில், ஆகஸ்ட் 30ம் தேதி உயிரிழந்த இந்த தொற்றின் பாதிப்பால் இறந்த 47 வயது நபரின் வீட்டு தோட்டத்தில், வௌவால்கள் இருப்பது கண்டறியப்பட்டுள்ளது. அந்த தோட்டத்தில் வாழை மரங்கள் நிறைந்து இருப்பதாலும், அவர் வீடு அமைந்திருக்கும் இடத்திற்கு அருகே ஒரு அடர்ந்த வானம் இருப்பதாகவும், அங்கேயும் நிறைய வௌவால்கள் இருப்பதாகவும் சுகாதாரத்துறையினர் கூறியுள்ளனர்.
வௌவால்கள் மூலம் பரவும் வைரஸ்
தோட்டத்தில் கண்டுபிடிக்கப்பட்ட வௌவ்வால்களின் எச்சங்கள், மருத்துவ ஆராய்ச்சிக்காக கொண்டு செல்லப்பட்டுள்ளது. அதன் பின்னரே இந்த தொற்றுக்கான ஆரம்பப்புள்ளி கண்டறியப்படும். மேலே குறிப்பிட்ட அந்த வனத்தில் காணப்பட்ட வௌவ்வால்களிடம் தான் சென்றமுறையும் நிபா வைரஸ் படிமங்கள் காணப்பட்டது என செய்திகள் கூறுகின்றன. பாதிக்கப்பட்ட அந்த நபர், வளைகுடா நாட்டில் கடை நடத்தி வந்ததாகவும், ஒன்றரை ஆண்டுகளுக்கு முன்பு தனது தந்தை நோய்வாய்ப்பட்டதால் கேரளாவுக்கு திரும்பியதாகவும் கூறுகிறார்கள். அதன்பின்னர், அவரது தோட்டத்திலேயே விவசாயத்தை பார்த்துக்கொண்டு, இங்கேயே தங்கிவிட்டதாக தெரிகிறது. நிபா வைரஸ், வௌவால்கள் கடித்த பழங்கள் மூலமாகவோ, அவற்றின் எச்சங்களை தொடுவதாலோ பரவுவதால், தற்போது பழ வியாபாரிகள் அதிகம் பாதிக்கப்பட்டுள்ளதாக செய்திகள் தெரிவிக்கின்றன.
ஸ்கெட்ச் போட்டு தூக்கும் சுகாதாரத்துறை
இதற்கிடையில், புதன்கிழமை அன்று, கேரளாவின் சுகாதாரத் துறை பாதிக்கப்பட்ட இருவரின் 'வழி வரைபடங்களை' வெளியிட்டது. அதன்படி, இறந்த நபருக்கு, ஆகஸ்ட் 22 ஆம் தேதி அறிகுறிகள் தோன்ற ஆரம்பித்தன. 23 ஆம் தேதி, அவர் ஒரு குடும்ப விழாவில் கலந்துகொண்டு, 25 ஆம் தேதி வங்கிக்குச் சென்றார். அதே நாளில், அவர் அருகிலுள்ள மசூதியில் பிரார்த்தனை செய்தார். அவர் ஆகஸ்ட் 30 அன்று ஒரு தனியார் மருத்துவமனையில் இறப்பதற்கு முன், இரண்டு வெவ்வேறு கிளினிக்குகளுக்குச் சென்றுள்ளார். இதுமட்டுமன்றி, அவர் இறந்தபோது, அது இயற்கை மரணம் என்று நினைத்து பலரும், சிறு வயதிலேயே இறந்துபோனாரே என்ற ஆற்றாமையினாலும், அவரது இறுதிச் சடங்கில் ஏராளமானோர் கலந்துகொண்டனர். தற்போது அவர்கள் அனைவரையும் தனிமை படுத்தியுள்ளது சுகாதாரத்துறை
இந்த காலவரிசையைப் பகிரவும்