மதுரை மக்களுக்கு நற்செய்தி; எம்.பி. சு.வெங்கடேசன் எக்ஸ் பக்கத்தில் வெளியிட்ட அறிவிப்பு
மதுரையில் புதிய மேம்பாலம் அமைக்க மத்திய அரசு ரூ.46.09 கோடி நிதியை ஒதுக்கீடு செய்து உத்தரவிட்டுள்ளது. மத்திய சாலை போக்குவரத்து மற்றும் நெடுஞ்சாலைகள் துறை அமைச்சர் நிதின் கட்கரி இதற்கான உத்தரவை வழங்கியுள்ளார். மதுரையில் நான்கு வழிச்சாலையான திண்டுக்கல் - கன்னியாகுமரி தேசிய நெடுஞ்சாலையில் துவரிமான் - மேலக்கால் சந்திப்பு அதிக விபத்துகள் நடைபெறும் இடமாக உள்ளது. இதுகுறித்து மதுரை நாடாளுமன்ற தொகுதியின் எம்பியான சு.வெங்கடேசன் நிதின் கட்கரியை சந்தித்து அங்கு மேம்பாலம் மற்றும் சுரங்கப்பாதை அமைக்க வலியுறுத்திய நிலையில், கடந்த ஆண்டு இதற்கான திட்டப் பணிகளை தயாரிக்க மத்திய அமைச்சர் நிதின் கட்கரி உத்தரவிட்டிருந்தார்.
மேம்பாலம் மற்றும் சுரங்கப்பாதைக்கு நிதி ஒதுக்கீடு
இதையடுத்து திட்டப் பணிக்கான அறிக்கை மற்றும் நிலம் எடுப்பு போன்ற பணிகள் கடந்த ஒரு ஆண்டாக நடந்து வந்த நிலையில், தற்போது அந்த பணிகள் முடிக்கப்பட்டு திட்டத்திற்கு ஒப்புதல் அளிக்கப்பட்டுள்ளது. இந்த திட்டத்திற்காக மத்திய அரசு ரூ.46.09 கோடியை ஒதுக்கீடு செய்துள்ள நிலையில், மதுரை நாடாளுமன்ற தொகுதி எம்பி சு.வெங்கடேசன் இந்த தகவலை தனது எக்ஸ் பக்கத்தில் பகிர்ந்துள்ளார். இது குறித்து அவர் வெளியிட்டுள்ள எக்ஸ் பதிவில், தனது கோரிக்கையை ஏற்று ஒப்புதல் வழங்கி, அதற்கு உரிய நிதி ஒதுக்கீடு செய்ததற்காக மத்திய நிதியமைச்சர் நிதின் கட்கரிக்கு நன்றி தெரிவித்தார். இந்த திட்டம் முடிக்கப்பட்டு நடைமுறைக்கு வரும்போது, துவரிமான் - மேலக்கால் சந்திப்பில் விபத்துக்கள் குறையும் என எதிர்பார்க்கப்படுகிறது.
