ராகுல் காந்தியை எதிர்த்து இங்கிலாந்து நீதிமன்றத்தில் வழக்கு தொடர இருக்கும் லலித் மோடி
செய்தி முன்னோட்டம்
காங்கிரஸ் தலைவர் ராகுல் காந்தி மீது இங்கிலாந்து நீதிமன்றத்தில் வழக்குத் தொடரப்போவதாக இந்தியன் பிரீமியர் லீக்(IPL) முன்னாள் தலைவர் லலித் மோடி அறிவித்துள்ளார்.
தன்னைக் ஊழல் மற்றும் பணமோசடி வழக்கில் தொடர்புபடுத்தி பேசியதற்காக ராகுல் காந்தி மீது அவதூறு வழக்கு தொடரப்போவதாக லலித் மோடி கூறியுள்ளார்.
IPLலில் நிதி முறைகேடு செய்ததாக குற்றம்சாட்டப்பட்டதை அடுத்து லலித் மோடி கடந்த 2010ஆம் ஆண்டு முதல் லண்டனில் வசித்து வருகிறார்.
சமீபத்தில், குஜராத் நீதிமன்றம் ராகுல் காந்திக்கு 2 வருட சிறை தண்டனை விதித்ததை அடுத்து, அவர் எம்பி பதவியில் இருந்து தகுதி நீக்கம் செய்யப்பட்டார்.
'மோடி' என்ற குடும்ப பெயரை பற்றி தவறாக பேசியது தொடர்பான வழக்கில் அவருக்கு இந்த தண்டனை வழங்கப்பட்டது.
இந்தியா
நான் தப்பியோடிய குற்றவாளி இல்லை: லலித் மோடி
கடந்த 2019ம் ஆண்டு மக்களவை தேர்தல் பிரச்சாரத்தின் போது கர்நாடக மாநில கோலார் பகுதியில் பேசிய ராகுல் காந்தி, "எப்படி அனைத்து திருடர்களும் 'மோடி' என்னும் பெயரினை பொதுவாக வைத்துள்ளார்கள்?" என்று கூறி இருந்தார். அப்போது, நீரவ் மோடி, நரேந்திர மோடி மற்றும் லலித் மோடி ஆகிய பெயர்களையும் அவர் குறிப்பிட்டிருந்தார்.
இதனாலேயே அவருக்கு தண்டனையும் வழங்கப்பட்டது.
இதை எதிர்த்து தற்போது ஒரு ட்விட்டர் பதிவை பகிர்ந்திருக்கும் லலித் மோடி, "நான் தப்பியோடிய குற்றவாளி என்பது போலவே ராகுல் காந்தி பேசுகிறார். ஏன்? எப்படி? எப்போது நான் குற்றவாளி ஆனேன்? ராகுல் காந்தி மீது குறைந்தபட்சம் இங்கிலாந்து நீதிமன்றத்திலாவது உடனே வழக்கு தொடர வேண்டும் என்று முடிவு செய்துள்ளேன்" என்று கூறியுள்ளார்.