ஆன்லைன் சூதாட்ட தடைக்கு எதிரான வழக்கில் மத்திய அரசுக்கு விளக்கம் கேட்டு நோட்டீஸ்
செய்தி முன்னோட்டம்
ஆன்லைன் கேமிங் ஒழுங்குபடுத்தல் மற்றும் தடைச் சட்டம், 2025-ஐ எதிர்த்துத் தாக்கல் செய்யப்பட்ட மனு தொடர்பாகப் பதிலளிக்கக் கர்நாடகா உயர்நீதிமன்றம் மத்திய அரசுக்கு உத்தரவிட்டுள்ளது. இந்தச் சட்டம் ஒரே இரவில் ஆயிரக்கணக்கான மக்களின் வாழ்வாதாரத்தைப் பறிப்பதாகக் குற்றம் சாட்டி இந்த மனு தாக்கல் செய்யப்பட்டுள்ளது. நீதிபதி பி.எம்.ஷியாம் பிரசாத் இந்த வழக்கை விசாரித்தார். மத்திய அரசு தனது பதிலைச் சமர்ப்பிக்கவும், இடைக்காலத் தடை கோரி மனுதாரர்கள் தங்கள் தரப்பு வாதங்களைச் சமர்ப்பிக்கவும் அவகாசம் அளித்து வழக்கை ஒத்திவைத்தார். மனுதாரர்கள் தரப்பில் ஆஜரான வழக்கறிஞர், இந்தச் சட்டம் ஜனாதிபதியின் ஒப்புதலைப் பெற்றிருந்தாலும், இன்னும் அதிகாரப்பூர்வமாக அறிவிக்கப்படவில்லை என்று தெரிவித்தார்.
வேலைவாய்ப்பு
வேலைவாய்ப்பு பறிக்கப்படும்
இந்தச் சட்டம் நடைமுறைக்கு வந்தால் லட்சக்கணக்கானோரின் வேலைவாய்ப்புகள் பாதிக்கப்படும் என்றும் மனுதாரர் தரப்பில் வாதிடப்பட்டது. "இந்தத் துறை ஒரே இரவில் மூடப்பட்டால் கடுமையான பின்விளைவுகள் ஏற்படும். இந்தச் சட்டம் அதிகாரப்பூர்வமாக அறிவிக்கப்படுவதற்கு முன்பு எங்களது வாதங்களைக் கேட்க வேண்டும். அல்லது அறிவிப்பதற்கு ஒரு வாரம் முன்பு எங்களுக்குத் தகவல் அளிக்க வேண்டும்," என்று அவர் கேட்டுக்கொண்டார். மத்திய அரசின் சார்பாக ஆஜரான சொலிசிட்டர் ஜெனரல் துஷார் மேத்தா, இந்தச் சட்டத்தின் சட்டபூர்வ தன்மை குறித்து நீதிமன்றம் ஆய்வு செய்வது இதுவே முதல் முறை என்று குறிப்பிட்டார். "சட்டமன்றம் ஒரு மசோதாவை நிறைவேற்றி, ஜனாதிபதியின் ஒப்புதலைப் பெற்ற பிறகு, அது சட்டமாக அறிவிக்கப்படுவது ஒரு அரசியலமைப்பு நடைமுறை." என்று அவர் கூறினார்.