உண்மைக்கு புறம்பான தகவல்களை அளிக்கிறது கர்நாடக அரசு - முதல்வர் மு.க.ஸ்டாலின்
நாடாளுமன்ற சிறப்பு கூட்டத்தொடரானது நாளை மறுநாள் டெல்லியில் துவங்கவுள்ள நிலையில் சென்னை அண்ணா அறிவாலயத்தில் திமுக எம்.பி.க்களுடன் தமிழக முதல்வர் மு.க.ஸ்டாலின் ஆலோசனை கூட்டம் நடத்தியுள்ளார். இந்த கூட்டத்தில் காவிரி நீர் விவகாரம் குறித்து பேசிய முதல்வர், கர்நாடகா அரசு தமிழகத்திற்கு சேரவேண்டிய காவிரி நீரின் பங்கினை உடனடியாக திறந்துவிட வேண்டும் என்று கூறியுள்ளார். தொடர்ந்து, காவிரி நீர் விவகாரத்தில் கர்நாடகா அரசு உண்மைக்கு புறம்பான தகவல்களை மத்திய அமைச்சரிடம் அளித்துள்ளது என்றும் குறிப்பிட்டு பேசியுள்ளார். இந்த விவகாரம் குறித்து துரைமுருகன் தலைமையில் எம்.பி.க்கள் மத்திய ஜல் சக்தித்துறை அமைச்சரிடம் மனு அளிப்பார்கள் என்றும் தெரிவித்துள்ளார்.
காவிரி நீர் விவகாரம் குறித்து தீர்மானம் நிறைவேற்றம்
மேலும், தமிழகத்திற்கு வினாடிக்கு 12,500 கன அடி நீரினை குறித்த காலத்தில் திறந்துவிட உத்தரவிட வேண்டும் என்றும் கோரிக்கை வைக்கப்படும் என்றும் கூறியதாக தெரிகிறது. காவிரி நீர் விவகாரத்தில் உச்ச நீதிமன்றம் மற்றும் நடுவர் மன்றம் அளித்த தீர்ப்புகளை மதிக்காமல், மழை குறைபாட்டினை காரணம்காட்டி கர்நாடகா தமிழகத்திற்கு சேரவேண்டிய காவிரி நீர் பங்கினை தராமல் இருக்கிறது. இதனால் குறுவை சாகுபடி, சம்பா பயிர்கள் உள்ளிட்டவைகளின் நிலை கேள்விக்குறியாகியுள்ளது. எனவே, உச்சநீதிமன்ற தீர்ப்புப்படி கர்நாடகா தமிழகத்திற்கு உடனடியாக தண்ணீரினை திறந்து விட மத்திய அரசு வலியுறுத்த வேண்டும் என்றும் இக்கூட்டத்தில் தீர்மானம் நிறைவேற்றப்பட்டுள்ளதாக தகவல்கள் வெளியாகியுள்ளது.
இந்த காலவரிசையைப் பகிரவும்