50% -70% தான் இடஒதுக்கீடு என கர்நாடக அமைச்சர் விளக்கம்; 100% இடஒதுக்கீடு மசோதா குறித்த பதிவை நீக்கிய சித்தராமையா
செய்தி முன்னோட்டம்
கர்நாடக முதல்வர் சித்தராமையா தலைமையிலான கர்நாடக அமைச்சரவை, மாநிலத்தில் உள்ள அனைத்து தனியார் நிறுவனங்களும் குரூப் சி மற்றும் குரூப் டி பதவிகளில் 100% கன்னடர்களுக்கு ஒதுக்க வேண்டும் என்ற மசோதாவுக்கு ஒப்புதல் அளித்துள்ளது என்ற செய்தி காலையில் பலத்த சர்ச்சையை ஏற்படுத்தியது.
இந்த நிலையில் , கர்நாடகாவில் உள்ள தனியார் நிறுவனங்களில் வேலை வாய்ப்புகளில் மேலாண்மை அல்லாத பணிகளுக்கு 70 சதவீதமும், நிர்வாக நிலை ஊழியர்களுக்கு 50 சதவீதமும் இட ஒதுக்கீடு செய்யப்பட வேண்டும் என்று தொழிலாளர் துறை அமைச்சர் சந்தோஷ் லாட் இன்று காலை தெரிவித்தார்.
முன்னதாக முதலமைச்சர் சித்தராமையா தெரிவித்தது போல 100 சதவீதம் இல்லை என்றும் அவர் தெளிவு படுத்தியுள்ளார்.
எக்ஸ் பதிவு
100 சதவீத இடஒதுக்கீடு பற்றிய பதிவை நீக்கிய முதலமைச்சர்
முன்னதாக, திங்களன்று நடைபெற்ற அமைச்சரவைக் கூட்டத்தைத் தொடர்ந்து, சமூக ஊடக தளமான X இல் முதலமைச்சர் இந்த முடிவை அறிவித்தார்.
"அமைச்சரவை கூட்டத்தில்... மாநிலத்தில் உள்ள அனைத்து தனியார் தொழிற்சாலைகளிலும் 'சி மற்றும் டி' கிரேடு பதவிகளுக்கு 100 சதவீத கன்னடர்களை ஆட்சேர்ப்பு செய்வது கட்டாயமாக்குவதற்கான மசோதாவுக்கு ஒப்புதல் அளிக்கப்பட்டது," என்று அவர் கூறினார்.
தற்போது இந்த விவகாரம் சர்ச்சையானதை தொடர்ந்து, இந்த பதிவும் நீக்கப்பட்டது.
இந்த தவறுதலாக எழுதப்பட்ட பதிவை அல்லது மசோதா மாற்றிஅமைக்கப்பட்டதா என்பது குறித்து விவரங்கள் வெளியாகவில்லை.