இந்த 75 ஆண்டுகளில் இந்தியா சாதித்தது என்ன?-விண்வெளி ஆராய்ச்சி
செய்தி முன்னோட்டம்
இன்று உலகளவில் இந்தியா முன்னணியில் இருக்கும் துறைகளுள் ஒன்று விண்வெளித்துறை. இந்தத் துறையில் டாப் 10 நாடுகளில் ஒன்றாக விளங்கி வருகிறது இந்தியா.
பிற உலக நாடுகள் அளவிற்கு விண்வெளிக்குத்துறைக்கு நிதி ஒதுக்கி, சக்தி வாய்ந்த விண்வெளித் தளவாடங்களை உருவாக்க முடியவில்லை என்றாலும், குறைந்த நிதியில் தங்களுக்கென ஒரு பாதையை வகுத்து செயல்பட்டு, அதில் வெற்றியும் கண்டிருக்கிறது இந்தியா.
குறைந்த செலவில், செவ்வாய் கிரக்கிற்கான திட்டத்தை வெற்றிகரமாகச் செயல்படுத்தியது இந்தியா தான். குறைந்த செலவில் செயற்கைக்கோள்களை விண்ணில் நிலைநிறுத்தும், வணிகச் செயல்பாடுகளைக் கொண்டிருப்பதும் இந்தியா தான்.
இந்தியா மட்டுமின்றி, பிற வளர்ந்த உலக நாடுகளும் கூட இந்தியாவின் விண்வெளித்துறையால் பயனடைந்து வருகின்றன.
விண்வெளி
தொடக்கப்புள்ளி:
1960-களில், இந்தியா உணவு உற்பத்தியில் தன்னிறைவடைய போராடிக் கொண்டிருந்த நேரத்தில், இந்திய விண்வெளி ஆராய்ச்சி தேசியக் குழுவின் தலைவர் விக்ரம் சாராபாய்க்கு ஒரு பேராசை இருந்தது.
அது, இந்தியாவின் தொலைத்தொடர்பு, கல்வி, மருத்துவம் மற்றும் கிராப்புற மேம்பாடு ஆகியவற்றுக்கு விண்வெளித் தொழில்நுட்பங்களைப் பயன்படுத்த வேண்டும் என்பது.
ஆனால், அந்த சமயத்தில் ராக்கெட் அல்லது செயற்கைக்கோளை உருவாக்குவதற்கான தொழில்நுட்பங்களை இந்தியா கொண்டிருக்கவில்லை. ஆனால், ஒரு சிலர் மட்டும் விக்ரம் சாராபாயின் மீது நம்பிக்கை வைத்தார்கள்.
விளைவு, 1975-ம் ஆண்டு ரஷ்யாவின் உதவியுடன் இந்தியாவின் முதல் செயற்கைக்கோளான ஆர்யபட்டா விண்ணில் ஏவப்பட்டது. இதனைத் தொடர்ந்து, அடுத்த பத்தாண்டுகளில் தொடர்புக்குத் தேவையான INSAT மற்றும் IRS செயற்கைக்கோள்களையும் விண்ணில் செலுத்தியது இந்தியா.
இந்தியா
உள்நாட்டு ராக்கெட் தயாரிப்பு:
செயற்கைக்கோளைத் தொடர்ந்து, இந்தியாவிற்கான சொந்த ராக்கெட் தொழில்நுட்பத்தை உருவாக்குவதில் கவனம் செலுத்தப்பட்டது. மேலும், இதற்கெல்லாம் உதவும் வகையில் 1969-ல் இஸ்ரோவும் நிறுவப்பட்டது.
1980-ல் செயற்கைக் கோளை விண்ணில் செலுத்தும் வகையிலான சிறிய SLV-3 ராக்கெட்டை உருவாக்கியது இந்தியா. 1984-ல் ராக்கேஷ் ஷர்மா என்ற முதல் இந்தியர் விண்வெளிக்குச் சென்று திரும்பியிருந்தார்.
2000-ம் ஆண்டு முதலே, இந்தியாவின் செயற்கைக்கோள்களை மட்டுமல்லாது பிற நாட்டு செயற்கைக்கோள்களை விண்ணில் செலுத்தவும் வணிக நோக்கத்துடன் உதவி செய்யத் தொடங்கியது இந்தியா.
இது ஒருவகையில் இந்தியாவின் வருவாய்க்கும் வழிவகை செய்தது. இந்தியாவின் இந்த விண்வெளி வளர்ச்சிக்கு வித்திட்ட விக்ரம் சாராபாயே, இந்திய விண்வெளித் திட்டங்களின் தந்தை என்றழைக்கப்பட்டார்.
சந்திரன்
நிலவை நோக்கிய இந்தியாவின் பயணம்:
இந்தியாவின் முக்கியமான விண்வெளித் திட்டங்களுள் சந்திரயான்-1. இந்தத் திட்டத்தின் மூலம், நிலவுக்கு ஆய்வுக்கலனை அனுப்பிய நாடுகள் பட்டியலில் நான்காவது நாடாக இணைந்தது இந்தியா.
ஆய்வுக்கலனை அனுப்பியது மட்டுமின்றி, நிலவில் தண்ணீர் இருப்பதற்கான சாத்தியக்கூறுகள் இந்தியாவின் சந்திரயான்-1 திட்டத்தின் மூலம் தான் முதன் முதலில் கண்டறியப்பட்டது.
இந்தத் திட்டங்களின் தொடர்ச்சியாகவே சந்திரயான்-2 மற்றும் சந்திரயான்-3 ஆகிய திட்டங்கள் தற்போது செயல்படுத்தப்பட்டிருக்கின்றன.
செயற்கைக்கோளை விண்ணில் செலுத்த பிற உலக நாடுகளை எதிர்பார்த்துக் காத்திருந்த இந்தியா, 2017-ல் ஒரே ஏவலில் 104 செயற்கைக்கோள்களை விண்ணில் செலுத்தி சாதனை படைக்கும் அளவிற்கு வளர்ச்சியைக் கண்டது.
செவ்வாய்
செவ்வாயை நோக்கிய பயணம்:
மார்ஸ் ஆர்பிட்டர் மிஷன் (மங்கல்யான்) என்ற திட்டத்துடன் செவ்வாயை நோக்கிய பயணத்தை 2013-ம் ஆண்டு மேற்கொண்டது இந்தியா. இந்தத் திட்டத்தின் மூலம் முதல் முயற்சியிலேயே செவ்வாயின் சுற்றுவட்டப்பாதையை அடைந்த நாடு என்ற பெருமையையும் பெற்றது இந்தியா.
21-ம் நூற்றாண்டில் இந்தியாவின் விண்வெளித்துறையை மேலும் ஒருபடி மேலே எடுத்துச் செல்ல IN-SPACe மற்றும் Department of Space ஆகிய அமைப்புகள் நிறுவப்பட்டன.
தற்போது விண்வெளிக்கு சுயமாக மனிதர்களை அனுப்பும் திட்டம், சூரியன் மற்றும் வெள்ளி ஆகியவற்றை செய்வதற்கான ஆய்வுக்கலன்களை அனுப்பும் திட்டம், எனப் பல்வேறு விண்வெளித் திட்டங்களை விரைவில் செயல்படுத்தவிருக்கிறது இந்திய விண்வெளி ஆய்வு நிறுவனமான இஸ்ரோ.