கிர்கிஸ்தானில் உள்ள தங்கள் நாட்டு மாணவர்களுக்கு இந்தியாவும் பாகிஸ்தானும் எச்சரிக்கை
கிர்கிஸ்தானின் தலைநகரில் சர்வதேச மாணவர்களை குறிவைத்து கூட்டு வன்முறை வெடித்துள்ளதால், பிஷ்கெக்கில் உள்ள மாணவர்கள் வீட்டிற்குள்ளேயே இருக்குமாறு இந்தியாவும் பாகிஸ்தானும் இன்று அறிவுறுத்தின. கிர்கிஸ்தானில் உள்ள இந்திய தூதரகம், "தற்போது நிலைமை அமைதியாக உள்ளது" என்று கூறியுள்ளது. ஆனால், இந்தியா, பங்களாதேஷ் மற்றும் பாகிஸ்தானைச் சேர்ந்த மாணவர்கள் வசிக்கும் பிஷ்கெக்கில் உள்ள மருத்துவப் பல்கலைக்கழகங்களின் சில விடுதிகள் வன்முறைக்கு மத்தியில் தாக்கப்பட்டதாக பாகிஸ்தானின் தூதரகம் கூறியுள்ளது. "நாங்கள் எங்கள் மாணவர்களுடன் தொடர்பில் இருக்கிறோம். தற்போது நிலைமை அமைதியாக உள்ளது. ஆனால் மாணவர்கள் வீட்டிற்குள்ளேயே இருக்குமாறும், ஏதேனும் சிக்கல் ஏற்பட்டால் தூதரகத்தைத் தொடர்பு கொள்ளுமாறும் அறிவுறுத்தப்படுகிறார்கள். எங்கள் 24—7 தொடர்பு எண் 0555710041 என்பதாகும்" என்று பிஷ்கெக்கில் உள்ள இந்தியா தூதரகம் ட்வீட் செய்துள்ளது.
இந்திய மாணவர்களின் நலன்களை கண்காணித்து வருகிறோம்": ஜெய்சங்கர்
வெளியுறவு அமைச்சகத்தின் தரவுகளின்படி, சுமார் 14,500 இந்திய மாணவர்கள் கிர்கிஸ்தானில் வசிக்கின்றனர். இந்திய தூதரகத்தின் பதிவை மறு ட்வீட் செய்த வெளியுறவுத்துறை அமைச்சர் எஸ் ஜெய்சங்கர், "பிஷ்கெக்கில் உள்ள இந்திய மாணவர்களின் நலன்களை கண்காணித்து வருகிறோம். தற்போது நிலைமை அமைதியாக இருப்பதாக கூறப்படுகிறது." என்று கூறியுள்ளார். மே 13 அன்று கிர்கிஸ் மற்றும் எகிப்திய மாணவர்களுக்கு இடையே நடந்த சண்டையின் வீடியோக்கள் ஆன்லைனில் வெள்ளிக்கிழமை வைரலானதைத் தொடர்ந்து வன்முறை அதிகரித்தது. "பிஷ்கெக்கில் உள்ள மருத்துவப் பல்கலைக்கழகங்களின் சில விடுதிகள் மற்றும் பாகிஸ்தானியர்கள் உட்பட சர்வதேச மாணவர்களின் தனியார் குடியிருப்புகள் தாக்கப்பட்டுள்ளன. அந்த விடுதிகளில் இந்தியா, பாகிஸ்தான் மற்றும் வங்கதேசத்தைச் சேர்ந்த மாணவர்கள் வசிக்கின்றனர்," என்று பிஷ்கெக்கில் உள்ள பாகிஸ்தான் தூதரகம் கூறியுள்ளது.
