CEC-க்கு எதிராக இன்று 'இண்டியா' கூட்டணி டெல்லியில் இன்று பிரம்மாண்ட பேரணி: 4,000 போலீசார் குவிப்பு
செய்தி முன்னோட்டம்
SIR நடைமுறையில் 'வாக்குத் திருட்டு' மற்றும் முறைகேடுகள் நடைபெற்றுள்ளதாகக் குற்றம்சாட்டி, தலைமைத் தேர்தல் ஆணையர் (CEC) ஞானேஷ் குமாரின் ராஜினாமாவை வலியுறுத்தி 'இண்டியா' கூட்டணி ஏற்பாடு செய்துள்ள பிரம்மாண்ட பேரணியும் கண்டன பொதுக்கூட்டமும் இன்று டெல்லியில் நடைபெறுகிறது. மல்லிகார்ஜுன கார்கே மற்றும் ராகுல் காந்தி தலைமையிலான 'INDIA' கூட்டணியின் முக்கியத் தலைவர்கள் அனைவரும் காங்கிரஸ் தலைவரின் உத்தியோகபூர்வ இல்லத்திலிருந்து பேரணி தொடங்கும் இடத்திற்கு திறந்தவெளிப் பேருந்துகளில் பயணம் செய்யவுள்ளனர்.
பேரணி
பொதுக்கூட்டம் மற்றும் மக்கள் பேரணி
மிண்டோ ரோடு - கோனாட் பிளேஸ் சந்திப்பில் இருந்து மதியம் 12 மணியளவில் பேரணி தொடங்கி ராம்லீலா மைதானத்தை அடையும்.
காலை 10 மணி முதல் மாலை 5 மணி வரை பொதுக்கூட்டம் நடைபெறவுள்ளது.
தலைவர்களுக்காக பிரம்மாண்ட மூவர்ணக் கொடி வடிவ கொட்டகையும், மாநில 'இண்டியா' கூட்டணிப் பிரதிநிதிகளுக்குத் தனி மேடைகளும், குடிநீர் மற்றும் கழிப்பறை வசதிகளும் விரிவாகச் செய்யப்பட்டுள்ளன.
இப்போராட்டத்தில் கலந்துகொள்ள இந்திய யூத் காங்கிரஸ் சார்பில் 20,000-க்கும் மேற்பட்ட தொண்டர்கள் டெல்லி வந்து சேர்ந்துள்ளனர்.
ஜம்மு காஷ்மீர், தமிழ்நாடு, மேற்கு வங்கம் உள்ளிட்ட நாட்டின் பல்வேறு மாநிலங்களில் இருந்தும் காங்கிரஸ், திரிணாமுல் காங்கிரஸ், சமாஜ்வாதி மற்றும் கூட்டணி கட்சிகளின் தொண்டர்கள், மாணவர்கள், தொழிற்சங்கத்தினர் மற்றும் பொதுமக்கள் திரண்டு வருகின்றனர்.
பாதுகாப்பு ஏற்பாடுகள்
4,000 போலீசார் & 14 பாதுகாப்பு மண்டலங்கள்
பேரணியை முன்னிட்டு டெல்லி காவல்துறை மற்றும் மத்திய ஆயுதக் காவல் படையினர் (CAPF) அடங்கிய 4,000-க்கும் மேற்பட்ட காவலர்கள் பாதுகாப்புப் பணியில் ஈடுபடுத்தப்பட்டுள்ளனர்.
ராம்லீலா மைதானம் 14 பாதுகாப்பு மண்டலங்களாகப் பிரிக்கப்பட்டு ஏஎஸ்பி தர அதிகாரிகளின் மேற்பார்வையில் வைக்கப்பட்டுள்ளது.
200-க்கும் மேற்பட்ட CCTV கேமராக்கள், ட்ரோன்கள் மற்றும் பாடி கேமராக்கள் மூலம் தீவிரமாகக் கண்காணிக்கப்பட்டு வருகிறது.
ITO, டெல்லி கேட், ராஜ்காட் மற்றும் அஜ்மேரி கேட் ஆகிய பகுதிகளில் போக்குவரத்து மாற்றங்கள் செய்யப்பட்டுள்ளன.