'குஷ்பூ மன்னிப்பு கேட்காவிட்டால் போராட்டம்' - எச்சரிக்கை விடுத்த தமிழக காங்கிரஸ்
செய்தி முன்னோட்டம்
சமீபத்தில் நடிகை த்ரிஷா குறித்து மன்சூர் அலிகான் ஓர் பேட்டியில் பேசியது தற்போது பெரும் சர்ச்சையினை ஏற்படுத்தியுள்ளது.
இது குறித்து தென்னிந்திய நடிகர் சங்கம் மற்றும் தேசிய மகளிர் ஆணையம் தனது எதிர்ப்பினை தெரிவித்திருந்தது.
இதனையடுத்து, மணிப்பூர் கலவரத்தில் பெண்கள் பாலியல் வன்கொடுமை செய்யப்பட்ட பொழுது நடவடிக்கை எடுக்காத தேசிய மகளிர் ஆணைய உறுப்பினர் குஷ்பூ, தற்போது த்ரிஷாவிற்காக மட்டும் குரல் கொடுத்துள்ளார் என்று எக்ஸ் வலைத்தளத்தில் ஓர் நபர் விமர்சித்திருந்தார்.
இதற்கு பதில் பதிவிட்ட குஷ்பூ, தங்களை போல்'சேரி மொழி'ல் பேசமுடியாது என்றும், 'என்ன நடவடிக்கை எடுக்கப்பட்டுள்ளது என்பதை கண் விழித்து பார்க்க வேண்டும்' என்றும் குறிப்பிட்டிருந்தார்.
இவர் உபயோகித்த 'சேரி மொழி' என்னும் வார்த்தை தற்போது பூதாகரமான சர்ச்சையினை எழுப்பியுள்ளது.
குஷ்பூ
குஷ்பூவுக்கு எதிராக சரமாரியான கேள்விகளை எழுப்பிய தமிழ்நாடு காங்கிரஸ் பட்டியலின பிரிவு தலைவர்
பலரும் குஷ்பூவிற்கு எதிராக தங்கள் கண்டனங்களை தெரிவித்து வருகிறார்கள்.
'சேரி மொழி' என்று குறிப்பிட்டதன் மூலம் அவர் நேரடியாக பட்டியலின மக்களை இழிவாக பேசியுள்ளார் எனக்கூறியுள்ள தமிழ்நாடு காங்கிரஸ் பட்டியலின பிரிவின் தலைவர் எம்.பி.யான ரஞ்சன் குமார்,
"இவ்விவகாரம் குறித்து நடிகை குஷ்பூ மன்னிப்பு கேட்கவேண்டும். இல்லையெனில் மாபெரும் போராட்டம் நடத்தபடும்" என்று எச்சரிக்கை விடுத்துள்ளார்.
மேலும், 'பாஜக'விற்கே உரிய சாதிய மனோபாவத்தினை தான் குஷ்பூ விஷமாக கக்கியுள்ளார்'என்றும்,
'தேசிய மகளிர் ஆணைய உறுப்பினர் என்றால் என்ன வேண்டுமானாலும் பேசலாமா?' என்றும் அவர் ஆவேசமாக பேசியுள்ளார்.
தொடர்ந்து, 'நீட் தேர்வு விவகாரத்தில் மாணவி அனிதா தற்கொலை செய்து கொண்ட பொழுது இந்த குஷ்பூ எங்கே போனார்?'என்று சரமாரியாக கேள்விகளை குஷ்பூவிற்கு எதிராக எழுப்பியுள்ளார்.