ஹத்ராஸ் கூட்ட நெரிசலில் பலர் பலியான சம்பவம்: 6 அதிகாரிகள் இடைநீக்கம்
செய்தி முன்னோட்டம்
கடந்த வாரம், உத்தரப் பிரதேசத்தின் ஹத்ராஸில் நடந்த மத நிகழ்ச்சியின் போது, கூட்ட நெரிசலில் சிக்கி 121 பேர் உயிரிழந்தனர்.
அது நடந்து ஒரு வாரம் ஆகும் நிலையில், இந்த வழக்கை விசாரித்த சிறப்புப் புலனாய்வுக் குழு(SIT), இன்று கிட்டத்தட்ட 300 பக்க அறிக்கையை சமர்ப்பித்துள்ளது.
அதிகமான மக்கள் அந்த இடத்தில் கூடியதே பலரின் உயிரிழப்புக்கு காரணமாகியது என்று அந்த அறிக்கையில் கூறப்பட்டுள்ளது.
இதில் எதுவும் சதி நடந்திருக்கிறதா என்பதும் விசாரிக்கப்பட்டு வருகிறது.
மேலும், SIT அறிக்கையின் அடிப்படையில் உள்ளூர் துணைப் பிரிவு மாஜிஸ்திரேட்(SDM), ஒரு வட்ட அதிகாரி மற்றும் நான்கு பேரை உத்தரபிரதேச அரசு இடைநீக்கம் செய்துள்ளது.
இடைநீக்கம் செய்யப்பட்ட அதிகாரிகளின் அலட்சியத்தால் தான் இந்த விபத்து நடந்தது என்று கூறப்படுகிறது.
உத்தரபிரதேசம்
மூத்த அதிகாரிகளுக்கு சரியான தகவலை வழங்காத அதிகாரிகள் இடைநீக்கம்
இந்த வழக்கை மேலும் ஆழமாக விசாரிக்க வேண்டும் என்று கூறியுள்ள SIT அறிக்கை, இந்த சம்பவத்திற்கு வழிவகுத்த உள்ளூர் நிர்வாகத்தின் தரப்பில் உள்ள குறைபாடுகளையும் சுட்டிக்காட்டியுள்ளது.
இதற்கிடையில், ஹத்ராஸில் கடந்த வாரம் மத நிகழ்ச்சியை ஏற்பாடு செய்த குழுவின் நிர்வாகம், அந்த கூட்டத்தை நிர்வகிப்பதற்கான ஏற்பாடுகளை தாங்கள் செய்யவில்லை எனக் கூறியுள்ளது.
உள்ளூர் காவல்துறையும் நிர்வாகமும் இந்த நிகழ்வை பெரிதாக எடுத்துக் கொள்ளவில்லை என்றும், மூத்த அதிகாரிகளுக்கு சரியான தகவலை வழங்கவில்லை என்றும் கூறப்படுகிறது.
அந்த நிகழ்ச்சியில் 80,000 பேர் மட்டுமே கலந்து கொள்வார்கள் என அதன் நிர்வாகம் அனுமதி வாங்கி இருக்கிறது. ஆனால், அதில் கிட்டத்தட்ட 2 லட்சத்துக்கும் அதிகமானோர் கலந்துகொண்டனர் என்பது குறிப்பிடத்தக்கது.