பட்டாசு வெடித்தால் நோய்கள் குணமாகும்: கொல்கத்தா பாஜக எம்.எல்.ஏ பாபியா அதிகாரி சர்ச்சை பேச்சு
செய்தி முன்னோட்டம்
பட்டாசு வெடிப்பதால் பல்வேறு விதமான நோய்கள் குணமாகும் என்று மேற்கு வங்க பாஜக எம்.எல்.ஏ பாபியா அதிகாரி பொது நிகழ்ச்சியில் பேசியது பெரும் சர்ச்சையை ஏற்படுத்தியுள்ளது. கொல்கத்தாவில் உள்ள டோலிகஞ்ச் தொகுதி சட்டமன்ற உறுப்பினரான இவர், தனது தொகுதியில் நடைபெற்ற காளி பூஜை பந்தல் திறப்பு விழாவில் பங்கேற்றுப் பேசினார். அப்போது அவர் மைக் பிடித்து பேசத் தொடங்கிய வேளையில், அவருக்கு மிக அருகில் பெரும் சத்தத்துடன் பட்டாசு ஒன்று வெடித்தது.
சர்ச்சை பேச்சு
எம்.எல்.ஏ பாபியா அதிகாரியின் சர்ச்சை பேச்சு
பட்டாசு வெடித்ததைத் தொடர்ந்து தனது பேச்சைத் தொடர்ந்த பாபியா அதிகாரி, "பட்டாசு வெடிப்பதால் பல நோய்கள் குணமாகும் என்பதை நீங்கள் கண்கூடாகப் பார்ப்பீர்கள்" என்று தெரிவித்தார்.
மேலும், "தீபாவளி மற்றும் காளி பூஜை பண்டிகையின்போது பட்டாசுகளை வெடிக்குமாறு முதலமைச்சர் கூறியுள்ளார்.
பட்டாசு இல்லாமல் காளி பூஜை எவ்வாறு முழுமையடையும்? நிச்சயமாக நாம் பட்டாசு வெடிப்போம்.
அதேநேரம் காவல்துறை விதிமுறைகளைப் பின்பற்றி பட்டாசுகளைப் பயன்படுத்துவோம்" என்று அவர் கூட்டத்தில் பேசினார். இவரது இந்தப் பேச்சு சமூக வலைதளங்களிலும் அரசியல் தளங்களிலும் பரவலான விமர்சனத்திற்கு உள்ளாகியுள்ளது.
முதலமைச்சரின் அறிவுறுத்தல்
மருத்துவ நிபுணர்களின் எச்சரிக்கை
முன்னதாக கொல்கத்தாவின் பல்வேறு பகுதிகளில் காளி பூஜை பந்தல்களைத் திறந்து வைத்த முதலமைச்சர் சுவேந்து அதிகாரி, பண்டிகையின்போது பட்டாசுகளை வெடிக்கலாம் என்று கூறியிருந்தாலும், ஒலி மற்றும் காற்று மாசுபாட்டைக் கருத்தில் கொண்டு சுற்றுச்சூழல் சார்ந்த பசுமைப் பட்டாசுகளை மட்டுமே பயன்படுத்த வேண்டும் எனப் பொதுமக்களுக்கு வேண்டுகோள் விடுத்திருந்தார்.
இதற்கிடையே, பட்டாசு வெடிப்பதால் நோய்கள் குணமாகும் என்பதற்கு எந்தவித மருத்துவ அல்லது அறிவியல் ஆதாரமும் இல்லை என்றும், மாறாக அதிலிருந்து வெளிவரும் நச்சுப் புகையும் நுண்துகள்களும் ஆஸ்துமா, மூச்சுத்திணறல் மற்றும் இதயப் பிரச்சனை உள்ளவர்களின் உடல்நிலையைக் கடுமையாகப் பாதிக்கும் என்றும் மருத்துவ நிபுணர்கள் தொடர்ந்து எச்சரித்து வருகின்றனர்.