வாக்காளர் பட்டியலில் பெயர் இல்லையா? 20 மாநிலங்களில் விடுபட்ட வாக்காளர்களை சேர்க்க தேர்தல் ஆணையம் சிறப்பு முகாம்

எழுதியவர் Sekar Chinnappan

Oct 02, 2026

10:13 am

செய்தி முன்னோட்டம்

வாக்காளர் பட்டியல் சிறப்புத் தீவிர திருத்தப் பணி (SIR) நிறைவடைந்துள்ள 20 மாநிலங்கள் மற்றும் யூனியன் பிரதேசங்களில், விடுபட்ட தகுதியான வாக்காளர்கள் மற்றும் புதிதாக வாக்களிக்கும் உரிமையை பெற்ற இளைஞர்களை வாக்காளர் பட்டியலில் சேர்ப்பதற்காக சிறப்பு முகாம்களை நடத்துமாறு அனைத்து மாநிலத் தலைமைத் தேர்தல் அதிகாரிகளுக்கும் இந்திய தேர்தல் ஆணையம் உத்தரவிட்டுள்ளது. செப்டம்பர் 29 அன்று பிறப்பிக்கப்பட்ட இக்கட்டளையை, மாநிலத் தேர்தல் அதிகாரிகளுடனான கலந்தாய்வுக் கூட்டத்தின் போது தேர்தல் ஆணையம் மீண்டும் வலியுறுத்தியுள்ளது. கூடுதல் விபரங்கள் இங்கே:-

படிவம் 6

படிவம் 6 பயன்பாடு எளிமையாக்கம்

சிறப்பு தீவிர திருத்தப் பணி (SIR) நடைபெற்ற கால கட்டத்தில், வாக்காளர் பதிவுக்கான படிவம் 6-இல் (Form 6) விண்ணப்பதாரர் மற்றும் அவர்களின் பெற்றோர் கடந்த சீரமைப்பின் போது வாக்காளர் பட்டியலில் இடம் பெற்றிருந்தனரா என்பது குறித்த கூடுதல் கேள்விகள்/அறிவிப்புகள் இடம்பெற்றிருந்தன.

ஆனால், தற்போது SIR பணிகள் நிறைவடைந்துள்ள மாநிலங்களில் இத்தகைய கூடுதல் நிபந்தனைகள் நீக்கப்பட்டு, வழக்கமான சட்டப்பூர்வ படிவம் 6 மூலமாகவே வாக்காளர்கள் பெயர் சேர்க்க விண்ணப்பிக்கலாம் என்று தேர்தல் ஆணையம் தெளிவுபடுத்தியுள்ளது.

உத்தரவு

தவறுதலாக நீக்கப்பட்ட வாக்காளர்களை கண்டறிய உத்தரவு

வாக்காளர் பட்டியல் திருத்தப் பணிக்கு முன்பும் பின்பும் தயாரித்த பட்டியல்களை ஒப்பீடு செய்து, தகுந்த அல்லது போதுமான ஆதாரங்கள் இன்றி நீக்கப்பட்ட வாக்காளர்களைக் கண்டறியுமாறு தேர்தல் அதிகாரிகளுக்கு அறிவுறுத்தப்பட்டுள்ளது.

இரட்டைப் பதிவு இல்லாத மற்றும் உயிரிழக்காத தகுதியான வாக்காளர்களின் வீடுகளுக்கு வாக்குச்சாவடி நிலை அதிகாரிகளை நேரடியாக அனுப்பி, படிவம் 6-ஐ பெற்று அவர்களை மீண்டும் வாக்காளர் பட்டியலில் இணைக்க நடவடிக்கை எடுக்கப்படும்.

இதற்கு அனைத்து அரசியல்கட்சிகளின் வாக்குச்சாவடி முகவர்களின் உதவியையும் நாடுமாறு கேட்டுக்கொள்ளப்பட்டுள்ளது.

கோவா

கோவா வழக்கு மற்றும் பணிகள் நிலுவையில் உள்ள மாநிலங்கள்

கோவா மாநிலத்தில் அதிகாரிகளால் தகுதியானவர்கள் எனக் கண்டறியப்பட்ட பின்னரும், இறுதி வாக்காளர் பட்டியலில் இருந்து விடுபட்ட 97 வாக்காளர்களின் வீடுகளுக்கு அதிகாரிகள் நேரில் சென்று விண்ணப்பங்களை பெற்று பட்டியலில் சேர்த்துள்ளனர்.

அதேநேரத்தில், டெல்லி, மகாராஷ்டிரா போன்ற SIR பணிகள் இன்னமும் தொடர்ந்து நடைபெற்று வரும் மாநிலங்களில், நோட்டீஸ் அனுப்பப்பட்ட வாக்காளர்கள் நேரடியாக ஆஜராகத் தேவையில்லை என்றும், அதிகாரிகள் வீடுகளுக்கே வந்து ஆவணங்களை சேகரிப்பார்கள் என்றும் தெரிவிக்கப்பட்டுள்ளது.

டெல்லியில் அக்டோபர் 30 வரையிலும், மகாராஷ்டிராவில் அக்டோபர் 12 வரையிலும் இதற்கான அவகாசம் நீட்டிக்கப்பட்டுள்ளது.