தர்மசாலா சர்ச்சையில் புகாரளித்தவர் பொய் சாட்சியம் அளித்ததாகக் கூறி அதிரடியாக கைது;
செய்தி முன்னோட்டம்
கர்நாடகாவில் உள்ள தர்மசாலா கிராமத்தில் கூட்டுப் புதைகுழிகள் உள்ளதாகக் கூறி, அதை அம்பலப்படுத்தியதாகக் கூறிக்கொண்ட சி.என்.சின்னையா என்கிற சென்னா, தற்போது பொய் சாட்சியம் அளித்த குற்றத்திற்காகக் கைது செய்யப்பட்டுள்ளார். அதிகாரிகளின் கூற்றுப்படி, அவர் அளித்த வாக்குமூலங்கள் போலியானவை மற்றும் புனையப்பட்டவை என்பது விசாரணையில் கண்டறியப்பட்டுள்ளது. இந்த வழக்கில் முக்கிய திருப்பமாக, காணாமல் போனதாகக் கூறப்பட்ட அனன்யா பட் என்ற மாணவி குறித்த அவரது தாயின் கூற்றுகளும் சர்ச்சைக்குள்ளாகியுள்ளன. முதலில் அனன்யா காணாமல் போனதாக சுஜாதா பட் என்பவர் கூறினார், பின்னர் அனன்யா என்ற ஒரு பெண்ணே இல்லை என ஒரு யூடியூப் சேனலுக்கு அளித்த பேட்டியில் தெரிவித்தார். தற்போது, தான் அந்த வாக்குமூலத்தை நிர்ப்பந்தத்தின் பேரில் அளித்ததாகக் கூறுகிறார்.
விசாரணைக் குழு
சிறப்பு விசாரணைக் குழு அமைப்பு
இந்த விவகாரம் கடந்த ஜூலை மாதம் சென்னா, ஒரு மண்டை ஓடுடன் காவல் நிலையம் வந்து, நூற்றுக்கணக்கான சடலங்களை புதைக்க உதவியதாகக் கூறி, பெரும் பரபரப்பை ஏற்படுத்தியபோது தொடங்கியது. இதையடுத்து இந்த வழக்கை விசாரிக்க சிறப்பு விசாரணைக் குழு (SIT) அமைக்கப்பட்டது. இந்த சம்பவம் கர்நாடக அரசியலில் பெரும் சர்ச்சையை ஏற்படுத்தியது. பாஜக, கோயிலை அவதூறு செய்ய காங்கிரஸ் முயற்சிக்கிறது என்று குற்றம் சாட்டியது. அதற்குப் பதிலளித்த காங்கிரஸ், இந்த விவகாரத்தை பாஜக அரசியல் ஆதாயத்திற்காகப் பயன்படுத்துகிறது என்று கூறியது. சென்னா மற்றும் சுஜாதா பட்டின் வாக்குமூலங்கள் மாறியுள்ள நிலையில், பாஜக இந்தக் குழுவின் நோக்கத்தை கேள்விக்குள்ளாக்கியுள்ளது.