விமானத்திற்குள் திடீர் புகை! டெல்லி - சென்னை இண்டிகோ விமானம் ஹைதராபாத்திற்குத் திருப்பப்பட்டு அவசரத் தரையிறக்கம்
செய்தி முன்னோட்டம்
டெல்லியிலிருந்து சென்னை நோக்கிப் பறந்து கொண்டிருந்த இண்டிகோ விமானத்தில் திடீரென புகை வெளியானதால் பெரும் பரபரப்பு ஏற்பட்டது. ஞாயிற்றுக்கிழமை (அக்டோபர் 11) நடைபெற்ற இந்த சம்பவத்தைத் தொடர்ந்து, விமானம் உடனடியாக ஹைதராபாத் ராஜீவ் காந்தி சர்வதேச விமான நிலையத்திற்குத் திருப்பப்பட்டுப் பாதுகாப்பாகத் தரையிறக்கப்பட்டது. விமானத்தில் இருந்த பயணிகள் மற்றும் விமானப் பணியாளர்கள் அனைவரும் எவ்வித காயமுமின்றிப் பாதுகாப்பாக மீட்கப்பட்டனர். இந்தத் திடீர் சம்பவத்தால் விமானப் பயணிகளிடையே சிறிது நேரம் பெரும் அச்சமும் பதற்றமும் நிலவியது.
அடர் புகை
மின்னணு சாதனத்திலிருந்து வெளியான அடர் புகை
விமானத்தின் ஓவர்ஹெட் பின்னில் வைக்கப்பட்டிருந்த பயணி ஒருவரின் தனிப்பட்ட மின்னணு சாதனத்திலிருந்து இந்தப் புகை வெளியாகியுள்ளது.
இதனை உடனடியாகக் கவனித்த விமானப் பணிப்பெண்கள் திறம்பட செயல்பட்டு சூழ்நிலையைக் கட்டுப்பாட்டிற்குள் கொண்டு வந்தனர்.
பின்னர் பாதுகாப்பு நடைமுறைகளின்படி விமானிகள் விமானத்தை ஹைதராபாத்திற்குத் திருப்பிப் பாதுகாப்பாகத் தரையிறக்கினர்.
பயணிகள் அனைவரும் விமானத்திலிருந்து பத்திரமாக இறக்கப்பட்டு, சென்னை செல்ல உடனடியாக மாற்று விமானத்திற்கு ஏற்பாடுகள் செய்யப்பட்டன.
இண்டிகோ நிறுவனம் இதற்காகத் தனது அதிகாரப்பூர்வ அறிக்கையையும் வெளியிட்டது.
லக்னோ விமானம்
மின்னல் தாக்கிப் பலத்த சேதமடைந்த லக்னோ விமானம்
முன்னதாக, அக்டோபர் 7 ஆம் தேதி பாட்னாவிலிருந்து லக்னோ சென்ற இண்டிகோ விமானம் சுமார் 17,000 அடி உயரத்தில் பறந்து கொண்டிருந்த போது பலத்த மின்னல் தாக்கியது.
இதில் விமானத்தின் முன்பகுதி பலத்த சேதமடைந்தது. இருப்பினும் விமானியின் துரிதமான கட்டுப்பாட்டால் விமானம் லக்னோ விமான நிலையத்திற்குத் திருப்பப்பட்டு அவசரமாகத் தரையிறக்கப்பட்டது.
அதில் பயணித்த 104 பயணிகளும் எவ்வித காயமுமின்றிப் பாதுகாப்பாக வெளியேற்றப்பட்டனர்.
மோசமான வானிலை காரணமாகவே இந்த மின்னல் தாக்குதல் நடைபெற்றதாக விமான நிலைய அதிகாரிகள் தெரிவித்தனர்.
பெங்களூரு
பெங்களூருவில் வால் பகுதி தரையில் மோதிய ஆபத்தான சம்பவம்
அதேபோல கடந்த செப்டம்பர் 27 அன்று அசாமின் குவாஹாட்டியிலிருந்து பெங்களூரு வந்த இண்டிகோ விமானம், கெம்பேகவுடா சர்வதேச விமான நிலையத்தில் தரையிறங்க முயன்ற போது பலத்த காற்றின் காரணமாக அதன் வால் பகுதி தரையில் மோதியது.
முதல் முயற்சியில் சிக்கல் ஏற்பட்டதை அடுத்து, விமானி இரண்டாவது முயற்சியில் விமானத்தை பாதுகாப்பாகத் தரையிறக்கினார்.
இந்த விபத்திலும் பயணிகள் மற்றும் ஊழியர்கள் யாருக்கும் எவ்வித காயமும் ஏற்படவில்லை.
இண்டிகோ விமானங்களில் அடுத்தடுத்து நடைபெறும் இதுபோன்ற சம்பவங்கள் பயணிகள் மத்தியில் கவலையை ஏற்படுத்தியுள்ளன.