டெல்லி விமான நிலைய சர்ச்சை: கைது செய்யப்பட்டார் பவன் கேரா
சத்தீஸ்கர் தலைநகர் ராய்ப்பூருக்கு செல்ல இருந்த காங்கிரஸ் தலைவர் பவன் கேரா டெல்லி விமான நிலையத்தில் வைத்து இன்று(பிப் 23) கைது செய்யப்பட்டார். ஏறக்குறைய 50 காங்கிரஸ் தலைவர்கள் விமானத்தை புறப்பட விடாமல் விமானம் ஓடும் பாதையில் ஒரு அரிய போராட்டத்தை நடத்தியதை தொடர்ந்து இது நடந்திருக்கிறது. அகில இந்திய காங்கிரஸ் கமிட்டியின்(ஏஐசிசி) கூட்டத்திற்காக காங்கிரஸ் தலைவர்கள் சென்று கொண்டிருந்த போது முதல் தகவல் அறிக்கையுடன்(FIR) விமான நிலையத்திற்கு வந்த அசாம் காவல்துறையினர், பவன் கேராவை கைது செய்தனர். ஏராளமான காங்கிரஸ் தலைவர்கள் விமானத்தில் இருந்து இறங்கி டெல்லி விமான நிலைய டார்மாக்கில் கோஷங்களை எழுப்பியும், விமானத்தின் அருகே உள்ளிருப்புப் போராட்டத்தில் ஈடுபட்டும் தங்கள் எதிர்ப்பை தெரிவித்தனர்.
இண்டிகோ விமான நிறுவனம் வெளியிட்ட அறிக்கை
"ராய்ப்பூர் செல்லும் விமானம் 6E 204ல் இருந்து ஒரு பயணியை போலீசார் இறக்கினர். வேறு சில பயணிகளும் தங்கள் சொந்த விருப்பத்தின் பேரில் இறங்க முடிவு செய்தனர். சம்பந்தப்பட்ட அதிகாரிகளின் ஆலோசனையை நாங்கள் பின்பற்றினோம். அதையடுத்து, தற்போது விமானம் தாமதமாகி இருக்கிறது. மேலும் மற்ற பயணிகளுக்கு ஏற்பட்ட சிரமத்திற்கு நாங்கள் வருந்துகிறோம்." என்று இண்டிகோ நிறுவனம் தெரிவித்திருக்கிறது. "என்னிடம் கையில் மட்டுமே பேக்கேஜ் இருந்தது. ஆனால், அவர்கள் எனது பேக்கேஜ்களில் சிக்கல் இருப்பதாக கூறினர். மேலும், என்னால் பயணம் செய்ய முடியாது என்றும் கூறினார்கள். பின்னர் டிசிபி(துணை போலீஸ் கமிஷனர்) உங்களை சந்திப்பார் என்றார்கள். நான் ரொம்ப நேரமாக காத்திருக்கிறேன்." என்று பவன் கேரா முன்பு கூறி இருந்தார்.
