அமெரிக்கா அடாவடியான நாடு; இந்தியாவுடன் துணை நிற்பதாக சீன தூதர் கருத்து
செய்தி முன்னோட்டம்
இந்தியாவின் மீது அமெரிக்கா விதித்துள்ள 50% கூடுதல் வரி விதிப்புக்கு சீனா வெளிப்படையாக எதிர்ப்பு தெரிவித்துள்ளது. இந்தியாவிற்கான சீன தூதர் சூ ஃபைஃபோங் (Xu Feihong), அமெரிக்காவை ஒரு அடாவடியான நாடு என்று வர்ணித்து, இந்த நடவடிக்கையை சீனா கண்டிப்பாக எதிர்க்கிறது என்று கூறினார். மௌனம் காப்பது இத்தகைய செயல்களை ஊக்குவிக்கும் என்று அவர் மேலும் தெரிவித்தார். அமெரிக்காவின் இந்த வரி விதிப்பில், 25% வர்த்தக வரியும், ரஷ்ய எண்ணெயை இந்தியா வாங்குவதால் விதிக்கப்பட்ட கூடுதல் 25% அபராதமும் அடங்கும். உக்ரைன் மீதான ரஷ்யாவின் ராணுவ நடவடிக்கைகளுக்கு இந்தியா மறைமுகமாக நிதியளிப்பதாக அமெரிக்கா குற்றம் சாட்டுகிறது.
அமெரிக்கா
வரிவிதிப்பை பேரம் பேசும் கருவியாக பயன்படுத்தும் அமெரிக்கா
நீண்ட காலமாக சுதந்திர வர்த்தகத்தால் பயனடைந்து வந்த அமெரிக்கா, இப்போது வரி விதிப்பை பேரம்பேசும் கருவியாகப் பயன்படுத்துகிறது என்று ஃபைஃபோங் விமர்சித்தார். "சீனா இந்தியாவுடன் உறுதியாக துணை நிற்கும்" என்று அவர் இந்தியாவின் ஒற்றுமையுடன் இருப்பதாக வலியுறுத்தினார். தற்போதைய பிரச்சினைக்கு அப்பால், இந்தியா மற்றும் சீனா இடையே வர்த்தகத்தை அதிகரிப்பதற்கான வாய்ப்புகளையும் தூதர் எடுத்துரைத்தார். மேலும், இந்தியாவும் சீனாவும் ஆசியாவின் இரட்டை எந்திரங்கள் என்றார். தகவல் தொழில்நுட்பம், மென்பொருள் மற்றும் உயிரிமருத்துவம் போன்ற துறைகளில் இந்தியாவுக்கு போட்டித்திறன் உள்ளதால், அதிக இந்தியப் பொருட்களை சீன சந்தையில் வரவேற்கத் தயாராக உள்ளதாக தெரிவித்தார். அதற்கு பதிலாக, மின்னணு உற்பத்தி, உள்கட்டமைப்பு மற்றும் புதிய எரிசக்தி போன்ற துறைகளில் சீனா ஒத்துழைப்புக்கு தயாராக உள்ளது என்றார்.