கச்சா எண்ணெய் மீது மீண்டும் விண்டுஃபால் வரியை உயர்த்தியது மத்திய அரசு!
கச்சா எண்ணெய் மீதான விண்டுஃபால் வரியை (Windfall Tax) மீண்டும் உயர்த்தியிருக்கிறது மத்திய அரசு. விண்டுஃபால் வரி என்றால் என்ன, அது ஏன் விதிக்கப்படுகிறது? விண்டுஃபால் வரி: ஒரு நிறுவனத்துக்கு அல்லது துறைக்கு எதிர்பாராத வகையில் திடீரென வெளிப்புறக் காரணிகளால், எதிர்பார்ப்பை விட கூடுதல் லாபம் கிடைக்கும் போது, அந்த லாபத்தின் மீது விண்டுஃபால் வரியை மத்திய அரசு விதிக்கும். ரஷ்யா-உக்ரைன் போரின் காரணமாக கடந்த ஆண்டு திடீரென பெட்ரோல் மற்றும் டீசல் விலைகள் உயர்ந்தன. வெளிப்புறக் காரணியால் ஏற்பட்ட இந்த விலையேற்றத்தால் பெட்ரோல், டீசல் நிறுவனங்களுக்கு எதிர்பாராமல் திடீரென அதிக லாபம் கிடைத்ததையடுத்து அந்தத் துறையில் விண்டுஃபால் வரியை அமல்படுத்தியது மத்திய அரசு.
இப்போது என்ன அறிவிப்பு:
தற்போது உள்நாட்டில் உற்பத்தி செய்யப்படும் கச்சா பெட்ரோல் மீது டன்னிற்கு ரூ.6,400-ஐ சிறப்பு கூடுதல் கலால் வரியாக விதித்திருக்கிறது மத்திய அரசு. இந்த வரி விதிப்பு பெட்ரோல் மற்றும் ஏவியேஷன் டர்பைன் எரிபொருள் வரிகளை பாதிக்காது என்றும் தெரிவிக்கப்பட்டுள்ளது. மேலும், டீசல் மீதான ஏற்றுமதி வரியை நீக்கியும் அறிவித்திருக்கிறது மத்திய அரசு. இதனால் டீசல் மீது ஏற்கனவே இருந்த சிறப்பு கூடுதல் கலால் வரி லிட்டருக்கு ரூ.0.50 முற்றிலும் நீக்கப்பட்டிருக்கிறது. இந்த அறிவிப்பு உற்பத்தி துறைக்கு நற்செய்தியாக அமைந்திருக்கிறது. விண்டுஃபால் வரியானது இரண்டு வாரங்களுக்கு ஒரு முறை பரிசீலனை செய்யப்பட்டு சந்தை நிலவரங்களுக்கு ஏற்ப கூட்டவோ, குறைக்கவோ அல்லது நீக்கவோ செய்யப்படும் என்பது குறிப்பிடத்தக்கது.
