மணிஷ் சிசோடியா கைது: கைதுக்கு காரணம் என்ன
டெல்லி மதுபானக் கொள்கை விவகாரத்தில் டெல்லி துணை முதலமைச்சர் மணிஷ் சிசோடியா 8 மணி நேரத்துக்கும் மேலான விசாரணைக்குப் பிறகு சிபிஐயால் நேற்று(பிப் 26) கைது செய்யப்பட்டார். கைது செய்யப்பட்ட இரண்டாவது டெல்லி அமைச்சர் இவர் ஆவார். மணிஷ் சிசோடியாவின் பதில்கள் திருப்திகரமாக இல்லை என்று மத்திய புலனாய்வுத் துறை(CBI) தெரிவித்துள்ளது. நேற்று காலை 11 மணிக்கு சிபிஐ தலைமையகத்துக்கு சென்ற மணிஷ் சிசோடியாவிடம், டெல்லி மதுபானக் கொள்கை ஊழல் குறித்து சுமார் 8 மணி நேரம் விசாரணை நடத்தப்பட்டது. FIRஇல் குறிப்பிடப்பட்டுள்ள தினேஷ் அரோரா மற்றும் பிற குற்றம் சாட்டப்பட்டவர்களுடன் அவருக்கு இருந்ததாகக் கூறப்படும் தொடர்பு மற்றும் தகவல் பரிமாற்றங்கள் குறித்து அவரிடம் கேள்வி கேட்கப்பட்டதாக சிபிஐ அதிகாரிகள் தெரிவித்தனர்.
சிறையில் இருக்கத் தயார்: மணிஷ் சிசோடியா
சிசோடியா விசாரணைக்கு ஒத்துழைக்கவில்லை என்று புலனாய்வாளர்கள் உணர்ந்ததாக அதிகாரிகள் தெரிவித்துள்ளனர். மேலும், முக்கியமான விஷயங்கள் குறித்து அதிகாரிகள் கேட்டதற்கு மனிஷ் சிசோடியா விளக்கம் அளிக்கவில்லை என்றும் அவர்கள் கூறினர். "அவர்(மணிஷ் சிசோடியா) மழுப்பலான பதில்களை அளித்தார். மேலும், ஆதாரங்கள் இருந்த போதிலும் விசாரணைக்கு ஒத்துழைக்கவில்லை" என்று சிபிஐ கூறியுள்ளது. சிசோடியாவை தீவிர விசாரணைக்கு உட்படுத்த காவலில் வைத்து விசாரணை செய்வது அவசியம் என்று சிபிஐ அதிகாரிகள் தெரிவித்தனர். மணிஷ் சிசோடியா திங்கள்கிழமை அன்று நீதிமன்றத்தில் ஆஜர்படுத்தப்படுவார் என்று சிபிஐ தெரிவித்துள்ளது. தனக்கு எதிரான வழக்கை "போலி" என்று கூறிய சிசோடியா, ஏழு- எட்டு மாதங்கள் சிறையில் இருக்கத் தயார் என்று முன்னதாக கூறியிருந்தார்.
