பாரத், பாரதம், இந்தியா..மூன்றிற்குமான வித்தியாசம் என்ன? அரசியலைப்பின்படி எது சரியான பெயர்?
நடைபெறவிருக்கும் ஜி20 உச்சிமாநாட்டை ஒட்டி, உலக தலைவர்களை இரவு விருந்திற்கு கலந்து கொள்ள, இந்தியாவின் மூத்த குடிமகள் என்ற முறையில், குடியரசு தலைவர் திரௌபதி முர்மு அழைப்பு விடுத்துள்ளார். ஆனால், அந்த இரவு விருந்திற்கான அழைப்பிதழில் 'இந்திய ஜனாதிபதி' என்று குறிப்பிடுவதற்கு பதிலாக 'பாரதத்தின் ஜனாதிபதி' என்று குறிப்பிடப்பட்டுள்ளது, தற்போது பெரும் சர்ச்சையை துவங்கியுள்ளது. இதனை அடுத்து, செப்டம்பர் 18 முதல் 22 வரை நடைபெறவுள்ள நாடாளுமன்றத்தின் சிறப்புக் கூட்டத் தொடரில், இந்தியாவின் பெயரை 'பாரத்' என்று மாற்ற, மத்திய அரசு நடவடிக்கை எடுக்கலாம் என்று கூறப்படுகிறது. ஆனால், இந்திய அரசியலைப்பின் படி, நமது நாட்டை, எவ்வாறு அழைக்க வேண்டும் என்பதை தெரிந்து கொள்வோமா?
பாரத் என்றால் என்ன?
சம்ஸ்கிருத நூல்களின் படி, பாரத் என்ற சொல்லிற்கு இரு பொருள்கள் இருக்கிறதாம். ஒன்று, 'தாங்க/ சுமக்க', மற்றொன்று, 'அறிவை தேடுபவர்'. பழம்பெரும் வரலாறு கொண்ட நம் இந்தியாவை, முற்காலத்தில் பாரதம் என்று தான் அழைத்து வந்தனர் என்பது வரலாறு தெரிந்த அனைவரும் அறிந்ததே. பாரதம், பாரத், பாரதவர்ஷ், பாரத்மாத என பல பெயர்களில் பாரதகண்டத்தை அழைத்தனர். இதற்கான குறிப்பும் பல புத்தகங்களில் இடம்பெற்றுள்ளன.
வேதங்களிலும், இதிகாசங்களிலும் குறிப்பிடுவது என்ன?
பரதம் என்ற பெயர் வேதபுத்தகங்களில் இடம்பெற்றுள்ளதாக ஆராச்சியாளர்கள் கூறுகின்றனர். 1 . ரிக் வேதத்தில், இது பரத குல அரசனின் பெயராக கூறப்படுகிறது 2 . மகாபாரதத்தின் துவக்கமே இந்த பெயரில் இருந்து தான். துஷ்யந்த மகாராஜா மற்றும் சகுந்தலைக்கு பிறந்த மகன் பாரத் எனவும், அவரின் வழித்தோன்றல்களே பாண்டவர்களும், கௌரவர்களும் என அதில் குறிப்பிடப்பட்டுள்ளது. 3 . ராமாயணத்தில், ராமனின் இளைய சகோதரன் பெயர் பரதன். 4 . நாட்டிய சாஸ்திரத்தின் ஆசிரியரும், நாடக கலைகள் பற்றி விளக்கம் தந்தவரும் பரதர். 5 . ரிஷப முனிவரின் மகன் பெயர் பரதன்
ஆராய்ச்சியாளர்கள் கூறுவது என்ன?
'தி ரிலீஜியன்ஸ் ஆப் இந்தியா' என்ற புத்தகத்தை எழுதிய ரோஷன் தலால் என்பவர், 'பாரதவர்ஷம்' என்ற நிலப்பரப்பு ஜம்புத்தீவின் ஒரு பகுதியாக இருந்துள்ளதாக புராணங்கள் கூறுகிறது என குறிப்பிடுகிறார். அதேபோல, 'பாரதவர்ஷா' என்ற பெயர், துஷ்யந்த மகாராஜாவின் மகன் பரத்திடம் இருந்து வந்தது என கூறுகிறார். மேலும், 'பாரத மாதா' என்ற பெயர், 19 ஆம் நூற்றாண்டில் தான் தோன்றியதாகவும், அதற்கான ஒரு உருவம் தந்து, ஒரு கோவிலை கட்டி, அதை, வாரணாசியில், 1936 -இல் மகாத்மா காந்தி திறந்து வைத்ததாகவும் கூறுகிறார்.
அரசியலமைப்பு கூறுவது என்ன?
"பாரத்" என்ற சொல் அரசியலமைப்பிலும் உள்ளது என்று அதிகாரிகள் தெரிவித்துள்ளனர். "இந்தியா, அதாவது பாரத், மாநிலங்களின் ஒன்றியமாக இருக்கும்" என்று இந்திய அரசியலமைப்பின் பிரிவு 1இல் குறிப்பிடப்பட்டுள்ளது. வெளிநாட்டு பிரதிநிதிகளுக்கு வழங்கப்பட்ட ஜி20 கையேட்டிலும் "பாரத்" என்ற வார்த்தை பயன்படுத்தப்பட்டுள்ளது. காங்கிரஸ் MP, சஷி தரூர், "நாட்டின் இரண்டு அதிகாரப்பூர்வ பெயர்களில் ஒன்றான இந்தியாவை "பாரத்" என்று அழைப்பதில் அரசியலமைப்பு ஆட்சேபனை இல்லை என்றாலும், பல நூற்றாண்டுகளாக கட்டமைக்கப்பட்ட கணக்கிட முடியாத பிராண்ட் மதிப்பைக் கொண்ட "இந்தியா" யை முற்றிலும் கைவிடும் அளவுக்கு அரசாங்கம் முட்டாள்தனமாக இருக்காது என்று நம்புகிறேன்.. உலகெங்கிலும் அங்கீகரிக்கப்பட்ட, வரலாற்றின் மறுபெயருக்கான எங்கள் உரிமைகோரலை கைவிடுவதற்குப் பதிலாக, இரண்டு சொற்களையும் நாம் தொடர்ந்து பயன்படுத்த வேண்டும்.' என கூறியுள்ளார்.
இந்த காலவரிசையைப் பகிரவும்