இந்திய ராணுவத்திற்கு 2028 மத்தியில் சொந்தமாக செயற்கைக்கோள்; இஸ்ரோவின் அதிரடி திட்டம்

எழுதியவர் Sekar Chinnappan

Oct 19, 2026

09:50 am

செய்தி முன்னோட்டம்

இந்திய ராணுவத்தின் செயல்பாட்டுத் திறனை அதிகரிக்கவும், போர்க்களத் தகவல் தொடர்பை பலப்படுத்தவும் GSAT-7B என்ற பிரத்யேக தகவல் தொடர்பு செயற்கைக்கோள் உருவாக்கப்பட்டு வருகிறது. இந்திய விண்வெளி ஆராய்ச்சி நிறுவனத்தால் (இஸ்ரோ) உருவாக்கப்பட்டு வரும் இந்த செயற்கைக்கோள், வரும் 2028 ஆம் ஆண்டின் இடைப்பகுதியில் விண்ணில் ஏவப்படும் எனப் பாதுகாப்புத் துறை உயர் அதிகாரிகள் தெரிவித்துள்ளதாக ஹிந்துஸ்தான் டைம்ஸ் வெளியிட்டுள்ள அறிக்கையில் தெரிவித்துள்ளது. தற்போது வரை இந்திய ராணுவத்திற்கு தனியாக செயற்கைக்கோள் இல்லாததால், விமானப்படையின் GSAT-7A செயற்கைக்கோளையே பயன்படுத்தி வருகிறது.

சிறப்பம்சங்கள்

GSAT-7B திட்டத்தின் முக்கிய சிறப்பம்சங்கள்

கடந்த 2023 மார்ச் மாதத்தில், இந்தியப் பாதுகாப்பு அமைச்சகம் இஸ்ரோவின் வணிகப் பிரிவான நியூஸ்பேஸ் இந்தியா லிமிடெட் நிறுவனத்துடன் ₹3,000 கோடி மதிப்பில் ஒப்பந்தம் செய்தது.

5 டன் எடை கொண்ட இந்த செயற்கைக்கோள், இந்தியாவின் மிகக் கனமான தகவல் தொடர்பு செயற்கைக்கோள்களில் ஒன்றாக இருக்கும்.

எல்லைப் பகுதிகளில் முகாமிட்டுள்ள படைகள், ஆயுத அமைப்புகள் மற்றும் வான்வழித் தளங்களுக்கு இடையிலான தொலைதூரத் தொடர்புகளுக்கு இந்த செயற்கைக்கோள் முழுமையான பாதுகாப்பை உறுதி செய்யும்.

பயன்கள்

எல்லைப் பகுதிகள் மற்றும் அவசரகாலப் பயன்பாடு

சீனா தனது விண்வெளி பாதுகாப்புத் திறன்களை அதிவேகமாக விரிவாக்கி வரும் நிலையில், இந்தியாவின் இத்திட்டம் மிக முக்கியமானதாகப் பார்க்கப்படுகிறது.

போர்க் காலங்கள் அல்லது எதிரிப் படைகளால் தரைவழித் தகவல் தொடர்பு நெட்வொர்க்குகள் துண்டிக்கப்படும் கடினமான சூழ்நிலைகளில், இச்செயற்கைக்கோள் ராணுவப் படைகளுக்கு இடையறாத, வலுவான தகவல் தொடர்பு வசதியை வழங்கும்.

சவாலான நிலப்பரப்புகளிலும் 24 மணிநேரக் கட்டுப்பாட்டு அமைப்பை நிலைநிறுத்த இது பெரிதும் உதவும்.

விண்வெளி பாதுகாப்பு

இந்திய முப்படைகளின் விண்வெளி பாதுகாப்பு உத்தி

சமீபத்தில் இந்திய விமானப்படைக்கு ₹2,563 கோடி செலவில் GSAT-7C செயற்கைக்கோளுக்கான ஒப்பந்தமும் கையெழுத்தாகியுள்ளது.

மேலும் கடற்படைக்கு GSAT-7R செயற்கைக்கோள் வெற்றிகரமாக சேவையில் இணைக்கப்பட்டுள்ளது.

முப்படைகளின் கூட்டு விண்வெளி பாதுகாப்புக் கொள்கை மற்றும் அடுத்த 3 ஆண்டுகளில் 52 ராணுவ செயற்கைக்கோள்களை ஏவும் திட்டம் ஆகியவற்றுடன் இணைந்து, இந்தியாவின் விண்வெளிப் பாதுகாப்புத் திறன் புதிய உச்சத்தைத் தொட்டுள்ளது.