TNPSC குரூப் 2, 2ஏ தேர்வுகளுக்கான ஆன்சர் கீ இன்னும் 6 நாட்களில் வெளியாகும்: TNPSC தலைவர் அறிவிப்பு
டிஎன்பிஎஸ்சி குரூப்-2 தேர்வுக்கான Answer Key இன்னும் 6 வேலை நாட்களில் வெளியிடப்படும் என்று TNPSC தலைவர் எஸ்.கே. பிரபாகர் ஐஏஎஸ் தெரிவித்துள்ளார். இதற்கு பிறகு, தேர்வர்கள் தங்களின் விடைக்குறிப்புகளைப் பார்த்து ஏதேனும் குழப்பங்கள் இருந்தால், ஆட்சேபனைகளை எழுப்பலாம் எனவும் அவர் கூறியுள்ளார். அதோடு விரைவில் தேர்வு முடிவுகள் வெளியாகும் எனவும் கூறியுள்ளார். இது பற்றி அவர் கூறியதாவது:"குரூப்-2 முதல்நிலைத் தேர்வு சமீபத்தில் சுமூகமாக நடைபெற்றது. இந்த தேர்வு மூலம் 61 வகையான பணியிடங்களுக்கு 2,327 பணியிடங்கள் நிரப்பப்படவுள்ளன. எதிர்காலத் திட்டங்கள்: இந்த ஆண்டில் TNPSC 10 தேர்வுகளை நடத்த திட்டமிட்டுள்ளது, அதில் 8 தேர்வுகளுக்கான அறிவிக்கைகள் வெளியாகி, தேர்வுகள் நடைபெற்று வருகின்றன. மீதமுள்ள இரண்டு தேர்வுகளுக்கான அறிவிக்கைகள் முன்னதாக அறிவிக்கப்படும்" என்றார்.
"2-3 மாதங்களில் விடைத்தாள் திருத்தும் பணி நிறைவு பெறும்"
குரூப் 2 தேர்வில் சுமார் 7.9 லட்சம் பேர் எழுதியதால், விடைத்தாள் திருத்தும் பணிகள் 2-3 மாதங்கள் ஆகக்கூடும். கூடுதல் ஸ்கேனிங் இயந்திரங்கள் மற்றும் நிபுணர்களை நியமித்துள்ளனர், மேலும் விரைவில் முடிவுகள் வெளியாகும். கடந்த மே மாதத்தில் நடைபெற்ற குரூப் 4 தேர்வின் முடிவுகள் வெளியிடுவதற்கான பணிகள் நடைபெற்று வருகின்றன. விரைவில் அந்த முடிவுகள் வெளியிடப்படும் எனவும் பிரபாகர் தெரிவித்தார். தமிழ்நாடு அரசுப் பணியாளர்கள் தேர்வாணையம் (TNPSC) குரூப் 2 மற்றும் குரூப் 2ஏ காலிப் பணியிடங்களுக்கான அறிவிப்பு கடந்த ஜூன் 20ஆம் தேதி வெளியிட்டது. அதன்படி, குரூப் 2 மற்றும் 2ஏ பதவிகளுக்கான போட்டித் தேர்வு, செப்டம்பர் 14 நடைபெற்றது.
