பயங்கரவாதி பன்னூனை கொல்ல சதி செய்ததாக குற்றச்சாட்டு: விசாரணை குழுவை அமைத்தது இந்தியா
செய்தி முன்னோட்டம்
அமெரிக்க மண்ணில் வைத்து காலிஸ்தான் பயங்கரவாதியை கொல்ல சதித்திட்டம் தீட்டியது தொடர்பான குற்றச்சாட்டுகளை விசாரிக்க உயர்மட்ட விசாரணைக் குழுவை இந்தியா அமைத்துள்ளது.
காலிஸ்தான் பயங்கரவாதி குர்பத்வந்த் சிங் பன்னூனை கொலை செய்ய இந்தியா சதி திட்டம் தீட்டியதாக சமீபத்தில் ஒரு குற்றச்சாட்டு எழுந்தது.
அரசாங்க வட்டாரங்களிடம் இந்த தகவலை பெற்றதாக பைனான்சியல் டைம்ஸ் (FT) செய்தி நிறுவனம் கடந்த வாரம் தெரிவித்திருந்தது.
மேலும், இந்த கொலை முயற்சியில் இந்திய அரசாங்கத்திற்கு தொடர்பு இருக்கலாம் என்பதால், இது குறித்து இந்தியாவுக்கு அமெரிக்கா எச்சரிக்கை விடுத்துள்ளதாகவும் பைனான்சியல் டைம்ஸ் கூறி இருந்தது.
கஜ்வ்ச
சம்பந்தப்பட்ட துறைகள் ஏற்கனவே இந்த பிரச்சினையை ஆராய்ந்து வருகின்றன
இந்நிலையில், இதுகுறித்து இன்று பேசியிருக்கும் வெளியுறவு அமைச்சக செய்தித் தொடர்பாளர் அரிந்தம் பாக்சி, "இந்த விவகாரத்தில் தொடர்புடைய அனைத்து அம்சங்களையும் ஆராய உயர்மட்ட விசாரணைக் குழுவை நவம்பர் 18ஆம் தேதி இந்தியா அமைத்தது." என்று கூறியுள்ளார்.
" அமெரிக்காவுடனான இருதரப்பு பாதுகாப்பு ஒத்துழைப்பு பேச்சுவார்த்தையின் போது, ஒழுங்கமைக்கப்பட்ட குற்றவாளிகள், துப்பாக்கி ஏந்தியவர்கள், பயங்கரவாதிகள் மற்றும் பிறருக்கு இடையே தொடர்பு இருப்பதாக சில தகவல்களை அமெரிக்க தரப்பு இந்தியாவுடன் பகிர்ந்து கொண்டது" என்று பாக்சி மேலும் தெரிவித்துள்ளார்.
"இதுபோன்ற தகவல்களை இந்தியா தீவிரமாக எடுத்துக்கொள்கிறது. மேலும் சம்பந்தப்பட்ட துறைகள் ஏற்கனவே இந்த பிரச்சினையை ஆராய்ந்து வருகின்றன." என்றும் கூறியுள்ளார்.
இதனையடுத்து, இந்த விவகாரத்தை விசாரிக்க உயர்மட்ட விசாரணைக் குழுவை இந்தியா அமைத்துள்ளது.