அக்னிவீரர்களுக்கு 2 ஆண்டுகள் பணி நீட்டிப்பில் திருமணம் செய்ய அனுமதி? மத்திய அரசு பரிசீலனை
செய்தி முன்னோட்டம்
அக்னிபாத் திட்டத்தின் கீழ் அக்னிவீரர்களுக்கு முன்மொழியப்பட்டுள்ள 2 ஆண்டுகள் கூடுதல் சேவை நீட்டிப்புக் காலத்தில் அவர்கள் திருமணம் செய்துகொள்வதற்கான கட்டுப்பாடுகளைத் தளர்த்துவது குறித்து மத்திய பாதுகாப்பு அமைச்சகம் பரிசீலித்து வருகிறது. தற்போதைய சேவை விதிகளின்படி, அக்னிவீரர்கள் தங்களது தொடக்க கட்ட 4 ஆண்டுகள் பணிப் காலத்தில் திருமணம் செய்துகொள்ளக் கடுமையான தடை விதிக்கப்பட்டுள்ளது. இருப்பினும் விரிவாக்கப்பட்ட பணி நீட்டிப்புக் காலத்தில் இந்த திருமணத் தடையைத் தளர்த்துவது அக்னிவீரர்களின் குடும்பத்தாரிடையே நிலவும் கவலைகளைப் போக்கும் என எதிர்பார்க்கப்படுகிறது.
வயது
பாதுகாப்புப் படைத் தலைமையின் யோசனையும் அக்னிவீரர்களின் வயதுக் காரணியும்
தொடக்க கட்ட 4 ஆண்டுகளில் செயல்பாட்டுக் கவனம் மற்றும் ராணுவ ஒழுங்கைப் பராமரிக்கத் திருமணத் தடை தொடரும் என்று பாதுகாப்புப் படை வட்டாரங்கள் தெரிவித்துள்ளன.
அதேவேளையில் 17.5 முதல் 21 வயதிற்குள் பணியில் சேரும் இளைஞர்கள், 6 ஆண்டுகள் சேவைக்கால முடிவில் தங்களது 20-களின் பிற்பகுதியை எட்டுவதால் இந்த குடும்பக் காரணிகளை ராணுவத் தலைமை பரிசீலித்து வருகிறது.
5 மற்றும் 6-வது ஆண்டுகளில் குடும்பம் சார்ந்த கவலைகளுக்குத் தீர்வு காண்பது வீரர்களின் மனவலிமையையும் தக்கவைப்பையும் அதிகரிக்கும் எனப் பாதுகாப்புத் துறை கருதுகிறது.
பணி நீட்டிப்பு
அக்னிபாத் திட்டத்தில் கொண்டுவரப்பட்ட 2 ஆண்டுகள் கூடுதல் பணி நீட்டிப்பு
அக்னிபாத் ஆட்சேர்ப்பு திட்டத்தில் அண்மையில் மத்திய அமைச்சரவை ஒரு முக்கியத் திருத்தத்திற்கு ஒப்புதல் அளித்தது.
இதன்படி 4 ஆண்டுகள் பணி முடித்து நிரந்தரப் பணியில் சேர்க்கப்படாத 75 சதவீத அக்னிவீரர்களுக்கு விருப்பத்தின் அடிப்படையில் கூடுதலாக 2 ஆண்டுகள் சேவை நீட்டிப்பு அளிக்கும் சலுகை அறிவிக்கப்பட்டது.
பாதுகாப்புப் படைகளின் தலைமைத் தளபதி ஜெனரல் என்.எஸ். ராஜா சுப்ரமணி அறிவித்த இப்புதிய கொள்கை மாற்றம், வீரர்கள் 6 ஆண்டுகள் வரை ராணுவத்தில் தொடர்வதற்கான இரண்டாம் கட்ட வாய்ப்பை வழங்கியுள்ளது.
சேவா நிதி அதிகரிப்பு
உயர்த்தப்பட்ட சேவா நிதி மற்றும் ராஜ்நாத் சிங்கின் கருத்துகள்
கூடுதல் பணி நீட்டிப்பைத் தேர்ந்தெடுக்கும் அக்னிவீரர்களுக்கு உயர்த்தப்பட்ட மாதச் சம்பளம், கூடுதல் சேவா நிதித் தொகுப்பு மற்றும் பணிமூப்பு சலுகைகள் வழங்கப்படும்.
மேலும் 6-வது ஆண்டின் இறுதியில் அவர்களின் செயல்திறன் அடிப்படையில் நிரந்தரப் பணி நியமனத்திற்கும் அவர்கள் பரிசீலிக்கப்படுவர்.
இக்கூடுதல் பதவிக் காலத்தை இரண்டாவது சுற்றுப் பணி என விவரித்துள்ள பாதுகாப்பு அமைச்சர் ராஜ்நாத் சிங், பயிற்சி பெற்ற வீரர்களைத் தக்கவைக்கவும் ராணுவத்தின் தயார்நிலையைப் பேணவும் இச்சீர்திருத்தங்கள் மேற்கொள்ளப்பட்டுள்ளதாகத் தெரிவித்தார்.