ஆருத்ரா வழக்கு - நடிகர் ஆர்.கே.சுரேஷ் ரூ.15 கோடி வாங்கியதாக குற்றப்பத்திரிக்கை தாக்கல்
செய்தி முன்னோட்டம்
தமிழகத்தில் சென்னை அமைந்தகரையை தலைமையிடமாக கொண்டு திருவள்ளூர், திருவண்ணாமலை, போன்ற பல இடங்களில் ஆருத்ரா கோல்டு டிரேடிங் பிரைவேட் லிமிடெட் என்னும் நிறுவனம் செயல்பட்டு வந்தது.
இந்நிறுவனத்தில் 1 லட்சம் முதலீடு செய்தால் மாதம் ரூ.36ஆயிரம் வட்டி வழங்கப்படும் என்ற விளம்பரம் செய்யப்பட்டது.
அதனை நம்பி கிட்டத்தட்ட ஒரு லட்சத்து 9,255 வாடிக்கையாளர்கள் பணத்தினை கொண்டுவந்து முதலீடு செய்துள்ளனர்.
இதன்மூலம், இந்நிறுவனம் ரூ.2,438 கோடி பெற்று மோசடி செய்தது என்று புகார்கள் எழுந்தது.
இதுகுறித்து வழக்குப்பதிவு செய்த பொருளாதார குற்றப்பிரிவு போலீசார் இந்நிறுவனத்தின் இயக்குனராக செயல்பட்டு வந்த ஹரிஸ், மாலதி ஆகியோரிடம் விசாரணை நடத்தினர்.
இதில் ஹரிஸ் கொடுத்த வாக்குமூலத்தின்படி, பாஜக கட்சியில் பொறுப்பினைப்பெற வாடிக்கையாளர்கள் முதலீடு செய்த பணத்தினை பயன்படுத்தியதாக கூறப்பட்டது.
குற்றப்பத்திரிக்கை
500 முகவர்களுக்கு சமமன் அனுப்ப குற்றப்பிரிவு போலீசார் முடிவு
இது பெரும் பரபரப்பினை ஏற்படுத்திய நிலையில், சினிமா நடிகரும், பாஜக நிர்வாகியுமான ஆர்.கே.சுரேஷுக்கு இதில் தொடர்பு உள்ளது என்று கூறப்பட்டது.
இந்நிலையில் இந்த ஆருத்ரா கோல்டு நிறுவன மோசடி வழக்கில் ஆர்.கே.சுரேஷ் ரூ.15 கோடி பணத்தினை வாங்கியுள்ளார் என்று குற்றப்பத்திரிக்கையில் தெரிவிக்கப்பட்டுள்ளது என்று செய்திகள் வெளியாகியுள்ளது.
இதனை தொடர்ந்து இந்த வழக்கில் மேலும் 500 முகவர்களுக்கு சமமன் அனுப்ப குற்றப்பிரிவு போலீசார் முடிவு செய்துள்ளார்கள் என்றும் தகவல்கள் தெரிவிக்கிறது.
இந்த 500 முகவர்கள் மூலம் இந்த மோசடியில் ரூ.800 கோடி வசூலிக்கப்பட்டுள்ளது என்பதும் போலீசார் நடத்திய விசாரணையில் தற்போது தெரிய வந்துள்ளது.
இதனையடுத்து குற்றப்பிரிவு போலீசார் தயாரித்துள்ள குற்றப்பத்திரிக்கை தொடர்பான ஆவணங்கள் இன்று(ஜூன்.,27)நீதிமன்றத்தில் தாக்கல் செய்யப்படவுள்ளது என்பது குறிப்பிடத்தக்கது.