நாடாளுமன்றத்தில் நிறைவேற்றப்பட்ட 4 ஆண்டுகளுக்கு பிறகு அமலுக்கு வந்தது குடியுரிமைச் சட்டம்
செய்தி முன்னோட்டம்
சர்ச்சைக்குரிய குடியுரிமை திருத்தச் சட்டத்தை அமல்படுத்துவதற்கான அறிவிப்பை மத்திய அரசு இன்று வெளியிட்டது.
2019 பொது தேர்தலில் குடியுரிமைச் சட்டத்தை முன்வைத்து தான் ஆளும் பாஜக கட்சி தேர்தல் பிரச்சாரத்தை செய்தது.
இந்நிலையில், 2024 பொது தேர்தல் இன்னும் சில வாரங்களில் நடைபெற உள்ள நிலையில், பாஜக அரசு குடியுரிமைச் சட்டத்தை அமல்படுத்தியுள்ளது.
பொது தேர்தலுக்கான தேதியை இந்திய தேர்தல் ஆணையம் அறிவிப்பதற்கு முன்னதாக இந்த அறிவிப்பு வெளியாகியுள்ளது.
டிசம்பர் 11, 2019அன்று நாடாளுமன்றத்தால் CAA மசோதா இயற்றப்பட்டது. இந்த சட்டத்திற்கு எதிராக விவாதங்களும் போராட்டங்களும் பல காலமாக நடந்து வருகிறது என்பது குறிப்பிடத்தக்கது.
மத அடிப்படையில் இந்திய குடியுரிமை வழங்குவதற்கு இந்த சட்டம் அனுமதிப்பதால் இதற்கு பலர் எதிர்ப்பு தெரிவித்து வருகின்றனர்.
இந்தியா
குடியுரிமைச் சட்டதிற்கு எதிராக நடந்த போராட்டங்கள்
இந்த சட்டத்தின் கீழ், பங்களாதேஷ், பாகிஸ்தான் மற்றும் ஆப்கானிஸ்தான் ஆகிய நாடுகளில் இருந்து 2015ஆம் ஆண்டுக்கு முன்னர் இந்தியாவிற்குள் நுழைந்த முஸ்லீம் அல்லாதவர்களுக்கு குடியுரிமையை உடனடியாக வழங்க முடியும்.
2019 டிசம்பரில் இந்த சட்டத்திற்கு எதிராக நடந்த வன்முறை போராட்டங்களில் 100க்கும் மேற்பட்டோர் உயிரிழநதனர். அந்த போராட்டங்களுக்கு மத்தியில், இதற்கான மசோதா நாடாளுமன்றத்தில் நிறைவேற்றப்பட்டது.
இஸ்லாமியர்கள் ஆதிக்கம் செலுத்தும் நாடுகளில் இருந்து வெளியேறும் சிறுபான்மையின மதத்தை சேர்ந்தவர்களை ஆதரிக்கும் நோக்கில் இந்த சட்டம் இயற்றப்பட்டுள்ளதாக பாஜக தெரிவித்திருந்தது.
ஆனால், இது இஸ்லாமியர்களுக்கு எதிரான பாகுபாடு என்றும், இது இந்திய அரசியலமைப்பின் மதச்சார்பற்ற கொள்கைகளை மீறுகிறது என்றும் எதிர்க்கட்சிகள் கூறி வருகின்றன.