எருமை மாட்டிற்காக 16 வயது சிறுவன் அடித்து கொலை - ஜார்கண்ட் மாநிலத்தில் நேர்ந்த கொடூரம்
செய்தி முன்னோட்டம்
ஜார்கண்ட் மாநிலத்திலுள்ள தும்கா மாவட்டம் சந்தாலி தோலாவி என்னும் பகுதியினை சேர்ந்த நண்பர்கள் 3 பேர் கால்பந்து போட்டியினை பார்வையிட சென்றுள்ளனர்.
அவ்வாறு சைக்கிளில் சென்று விட்டு திரும்பி கொண்டிருக்கையில் ஹன்ஸ்திஹா என்னும் பகுதியருகே சாலையில் நின்று கொண்டிருந்த எருமை மாடு மீது மோதியதாக கூறப்படுகிறது.
இதன் காரணமாக அப்பகுதியில் இருந்த மக்களுக்கும், சைக்கிளில் வந்த 3 பேருக்கும் இடையே வாக்குவாதம் ஏற்பட்டுள்ளது.
இதனிடையே காயமுற்ற எருமையின் உரிமையாளருக்கு இழப்பீடு வழங்குவதாக சிறுவர்கள் ஒப்புக்கொண்டுள்ளனர்.
எனினும் அக்கூட்டத்தில் இருந்த 4 பேர் சிறுவர்களை ஓயாமல் அடித்துள்ளனர்.
கொலை
உயிரிழந்த சிறுவனின் பெற்றோர் மற்றும் உறவினர்கள் போராட்டம்
இதில் 16 வயது சிறுவன் ஒருவனுக்கு பலத்த காயம் ஏற்பட்டுள்ளது.
இதனையடுத்து அவரை அருகிலுள்ள சுகாதார மையத்திற்கு அழைத்து சென்று பரிசோதித்து பார்த்ததில் அவர் ஏற்கனவே இறந்து விட்டதாக கூறியுள்ளனர்.
இதனை தொடர்ந்து, ஒரு எருமை மாட்டின் மீது மோதிய காரணத்தினால் அடித்தே கொலை செய்யப்பட்ட அந்த சிறுவனின் பெற்றோர் மற்றும் உறவினர்கள் போராட்டத்தில் ஈடுபட்டதாக தெரிகிறது.
தங்கள் மகனை அடித்து கொன்ற குற்றவாளிகள் கைது செய்யப்பட வேண்டும் என்று கூறி அவர்கள் போராட்டம் செய்துள்ளனர்.
மேலும் சாலை மறியலிலும் ஈடுபட்டதாக கூறப்படுகிறது.
இந்நிலையில் இது குறித்து வழக்குப்பதிவு செய்த காவல்துறை, குற்றம்சாட்டப்பட்ட குற்றவாளிகள் 2 நாட்களுக்குள் கைது செய்யப்படுவார்கள் என்று உறுதியளித்துள்ளனர்.
இதன் பின்னர் அவர்கள் போராட்டத்தினை கைவிட்டனர் என்பது குறிப்பிடத்தக்கது.