'டோரதி' படத்தில் வந்த சுவர் ஓவியப் பெண் யார்?
செய்தி முன்னோட்டம்
திருநங்கைகளின் உணர்வுகள், உரிமைகள், பாலின அடையாளம் மற்றும் சமூகத்தின் பார்வையை மிக அழுத்தமாகப் பேசி சமீபத்தில் வெளியாகி பரவலான பாராட்டுகளையும் விவாதங்களையும் பெற்று வரும் திரைப்படம் 'டோரதி'. இப்படத்தின் தொடக்கக் காட்சிகளில் இடம்பெற்ற ஒரு சுவர் ஓவியம் பார்வையாளர்களின் கவனத்தை ஈர்த்துள்ளது. அது இந்திய வரலாற்றின் பக்கங்களில் நீண்ட காலம் மறைக்கப்பட்ட, ஆனால் போற்றப்பட வேண்டிய கல்விப் புரட்சியாளரான பாத்திமா ஷேக்கின் திருவுருவமாகும். இந்தியாவின் முதல் முஸ்லிம் பெண் ஆசிரியர் என்று வரலாற்றால் அங்கீகரிக்கப்பட்ட இவர், 19-ஆம் நூற்றாண்டில் பெண்கள் மற்றும் அடித்தட்டு ஒடுக்கப்பட்ட மக்களின் கல்வி உரிமைக்காகத் தனது ஒட்டுமொத்த வாழ்க்கையையும் அர்ப்பணித்த மாபெரும் ஆளுமை ஆவார்.
புரட்சி இல்லம்
பூலே தம்பதியருக்கு அடைக்கலம் தந்த புரட்சி இல்லம்
1800-களில் பெண்கள் வீட்டை விட்டு வெளியே வரக்கூடாது, அடுப்பங்கரையே அவர்களின் உலகம் என்ற ஆணாதிக்கக் கட்டுப்பாடுகள் கோலோச்சிய காலத்தில், அடித்தட்டு சமூகத்து பெண்களுக்கும் சிறுபான்மையின பெண்களுக்கும் கல்வி என்பது எட்டாக்கனியாக இருந்தது.
அச்சூழலில் ஜோதிராவ் பூலே மற்றும் அவரது மனைவி சாவித்ரிபாய் பூலே ஆகியோர் பெண்களுக்குக் கல்வி புகட்டத் துணிந்தபோது, சொந்தக் குடும்பமும் பழமைவாத சமூகமும் அவர்களைக் கடுமையாக எதிர்த்து வீட்டை விட்டுத் துரத்தியது.
யாருமே அடைக்கலம் தர அஞ்சிய இக்கட்டான காலகட்டத்தில், புனேவில் அவர்களுக்குத் தனது வீட்டின் கதவைத் திறந்து அடைக்கலம் கொடுத்தவர் உஸ்மான் ஷேக்.
அவரது அன்புச்சகோதரியான பாத்திமா ஷேக், பூலே தம்பதியருக்கு அடைக்கலம் கொடுத்ததோடு நில்லாமல் தனது வீட்டு வளாகத்திலேயே பெண்கள் பள்ளி தொடங்க முழு ஆதரவையும் வழங்கினார்.
போராட்டங்களும்
கல்விப் புரட்சியும் கல்லடி பட்ட போராட்டங்களும்
1848-ஆம் ஆண்டு புனேவில் இண்டிஜினஸ் லைப்ரரி என்ற பெயரில் நாட்டின் முதல் பெண்கள் பள்ளி தொடங்கப்பட்டபோது, ஒரு பெண் பள்ளிக்குச் செல்வதே பாவம் என்று பேசப்பட்ட சமூகத்தில், அமெரிக்க மிஷனரி சிந்தியா ஃபாரரிடம் முறைப்படி ஆசிரியர் பயிற்சி பெற்று இந்தியாவின் முதல் முஸ்லிம் பெண் ஆசிரியராகப் பாத்திமா ஷேக் வகுப்பறைக்குள் நுழைந்தார்.
பள்ளிக்குச் செல்லும் வழியில் மதவாதிகளும் பழமைவாதிகளும் அவர் மீது சேற்றையும், அழுகிய முட்டைகளையும், சாணத்தையும் வீசி எறிந்தனர்.
எதற்கும் அஞ்சாத பாத்திமா, மாற்று ஆடைகளை பையில் எடுத்துச் சென்று வகுப்பறைக்குச் சென்றதும் உடை மாற்றிப் பாடம் நடத்தினார்.
மேலும் புனேயின் சேரிகளுக்கு நேரடியாகச் சென்று பெற்றோர்களின் கைகளைப் பிடித்துக் கண்ணீருடன் மன்றாடி, சிறுமிகளைப் பள்ளிக்கு வரவழைத்து சமத்துவக் கல்வியை ஊட்டினார்.
டோரதி திரைப்படம்
டோரதி திரைப்படம் உணர்த்தும் தியாகப் பாடம்
சாதியாலும் பாலினத்தாலும் ஒடுக்கப்பட்ட தலித் மற்றும் முஸ்லிம் சிறுமிகளுக்கு ஒரே வகுப்பறையில் சமத்துவக் கல்வியை வழங்கி, பெண்கள் கல்வித் துறைக்குள் நுழைய வித்திட்ட பாத்திமா ஷேக்கின் பெயர் இந்திய வரலாற்றில் நீண்ட காலம் மறைக்கப்பட்டிருந்தது.
பாலின சமத்துவம் மற்றும் விளிம்புநிலை மனிதர்களின் உரிமை பேசும் 'டோரதி' திரைப்படத்தில் அவரது திருவுருவ ஓவியம் காட்சிப்படுத்தப்பட்டுள்ளது.
மாற்றத்தை நோக்கி அடி எடுத்து வைக்கும் போது முதலில் எதிர்ப்புகள் எழும், ஆனால் அதை உடைத்து நிற்கும் புரட்சியாளர்களே வரலாற்றை எழுதுவார்கள் என்பதைப் பறைசாற்றும் வகையில் பாத்திமா ஷேக்கின் முகம் அங்கு நினைவுகூரப்பட்டுள்ளது.
கல்வி மறுக்கப்பட்ட இருண்ட காலத்தில் கல்லடி பட்டுப் பெண்கள் கைகளில் புத்தகங்களைக் கொடுத்த பாத்திமா ஷேக், இன்றும் ஒவ்வொரு பெண்ணின் வளர்ச்சிக்கும் வழிகாட்டியாகத் திகழ்கிறார்.