'லியோ' படத்தின் சிறப்பு காட்சிக்கு விதிக்கப்பட்ட புது கட்டுப்பாடுகள்
செய்தி முன்னோட்டம்
லோகேஷ் கனகராஜ் இயக்கத்தில் விஜய் நடித்துள்ள படம் 'லியோ'.
செவன் ஸ்க்ரீன் ஸ்டுடியோஸ் தயாரித்துள்ள இப்படம் வரும் 19ம்.,தேதி திரையரங்குகளில் மிக பிரம்மாண்டமாக ரிலீஸாகவுள்ளது.
இந்நிலையில் இப்படத்தின் சிறப்பு காட்சிகள் குறித்த கட்டுப்பாடுகளை தமிழக அரசு அறிவித்துள்ளது.
அதன்படி, திரைப்படம் ரிலீஸாகும் 19ம்.,தேதி முதல் 24ம்.,தேதி வரை மட்டுமே சிறப்பு காட்சிகளுக்கு அனுமதி வழங்கப்பட்டுள்ளது.
அதே போல் சிறப்பு காட்சி காலை 9 மணிக்கு தான் துவங்க வேண்டும், இறுதி காட்சி நள்ளிரவு 1.30 மணியோடு முடிக்கப்பட வேண்டும் என்றும் கூறப்பட்டுள்ளது.
ஒவ்வொரு திரையரங்குகளிலும், ஒரு நாளைக்கு 5 காட்சிகள் மட்டுமே திரையிடப்பட வேண்டும்,
திரையரங்குகளுக்கு வரும் ரசிகர்களுக்கு உரிய பாதுகாப்பு ஏற்பாடுகள் செய்திருக்க வேண்டும் என்றும் திரையரங்கு நிர்வாகங்களுக்கு அறிவுறுத்தப்பட்டுள்ளது.
லியோ
விதி மீறல் ஏற்படாமல் கண்காணிக்க சிறப்பு குழு
மேலும், 'லியோ' படத்தின் சிறப்பு காட்சிகள் திரையிடப்படுவதில் விதி மீறல் ஏற்படாமல் கண்காணிக்க சிறப்பு குழு ஒன்றினை அமைக்க முதன்மை செயலாளர் அமுதா ஐஏஎஸ் அனைத்து மாவட்ட காவல்துறை கண்காணிப்பாளர்களுக்கு உத்தரவிட்டுள்ளார்.
முன்னதாக நடிகர் அஜித் படத்தின் 'துணிவு' படத்தின் சிறப்பு காட்சி திரையிடல் கொண்டாட்டத்தின் பொழுது ரசிகர் ஒருவர் உயிரிழந்த சம்பவமே, இத்தனை கட்டுப்பாடுகளுக்கும் காரணமாகும்.
இதற்கிடையே லியோ படக்குழு, படம் ரிலீசாகும் முதல் நாள் மட்டும் 4 மணிக்கு சிறப்பு காட்சி திரையிடவும், பின்னர் 20ம் தேதி முதல் 24ம் தேதி வரை காலை 7 மணிக்கு சிறப்பு காட்சி திரையிடவும் அனுமதி கோரியது என்பது குறிப்பிடத்தக்கது.