பாலிவுட் நடிகர் சித்தார்த் மல்ஹோத்ராவை திருமணம் செய்ய போகும் 'தோனி' பட நாயகி கியாரா
கிரிக்கெட் வீரர் தோனியின் சுயசரிதை படமான 'MS தோனி' படத்தில் நடித்தவர் பாலிவுட் நடிகை கியாரா அத்வானி. இவரும், 'ஷேர்ஷா', 'மிஷன் மஜ்னு' போன்ற படத்தில் நடித்த சித்தார்த் மல்ஹோத்ராவும் காதலித்து வருவதாக கிசுகிசுக்கப்பட்டது. தற்போது இவர்கள், திருமணம் செய்யவிருப்பதாக ஊடக செய்திகள் தெரிவிக்கின்றன. எனினும் இது குறித்து இருவர் தரப்பிலும் எவ்வித அதிகாரபூர்வ தகவலும் இல்லை. அவர்கள் திருமணம் குறித்த விவரங்களை யூக அடிப்படையில், பத்திரிகைகள் வெளியிட்ட வண்ணம் உள்ளது. அவற்றின் தொகுப்பு இதோ: சித்தார்த்- கியாரா ஜோடி, ராஜஸ்தான் மாநிலம், ஜெய்சால்மரின் 'சூர்யகர்' என்ற நட்சத்திர விடுதியை தங்கள் திருமணத்திற்காக தேர்ந்தெடுத்துள்ளனர். இவர்களது திருமண நிகழ்ச்சிகள், சனிக்கிழமை (பிப்ரவரி 4) துவங்கி, அடுத்த திங்கட்கிழமை (பிப்ரவரி 6) வரை நடைபெறும்.
அரச மாளிகையில் திருமண வைபவம்
இந்த நட்சத்திர விடுதி, ஒரு பழங்காலஅரச மாளிகை ஆகும். இதில் ஒரு அறையின் வாடகை, கிட்டத்தட்ட ரூ. 60,000. இவர்கள் திருமண நிகழ்வுகள் அனைத்தும்- மெஹந்தி விழா முதல் ஹல்டி மற்றும் சங்கீத் வரை, இந்த பாலைவன கோட்டையில் தான் நிகழப்போகிறது. சங்கீத்தில் இசைக்கப்படும் பாடல்களின் தொகுப்பை, கியாரா, தானே தேர்ந்தெடுத்தார் எனவும், அதில் குறிப்பாக 'ஷெர்ஷா' பட பாடல் இடம் பெற வேண்டும் எனவும் கூறினாராம். காரணம், அந்த படத்தின் படப்பிடிப்பின் போது தான் இருவரும் காதல் வயப்பட்டனர். திருமண வைபவத்தில், பாலிவுட்டின் பிரபலங்கள் அனைவரும் கலந்து கொள்வார்கள் என எதிர்பார்க்கப்படுகிறது. ராஜஸ்தானில் திருமணம் முடிந்த பிறகு, இந்த ஜோடி மும்பையில் ஒரு பிரமாண்ட வரவேற்பு நிகழ்ச்சியை நடத்த திட்டமிட்டுள்ளதாக தெரிகிறது.
