யூடியூபில் களமிறங்கிய சல்மான் கான்: குழந்தைகளுக்கு மட்டுமே இந்தக் கன்டென்ட் என விளக்கம்
செய்தி முன்னோட்டம்
பாலிவுட் திரையுலகின் உச்ச நட்சத்திரமான சல்மான் கான் (Salman Khan) தனது அதிகாரப்பூர்வ யூடியூப் சேனலை பீயிங் தி சல்மான் கான் (Being The Salman Khan) என்ற பெயரில் அக்டோபர் 9 அன்று அதிகாரப்பூர்வமாகத் தொடங்கியுள்ளார். தற்போது பிக் பாஸ் 20 நிகழ்ச்சியைத் தொகுத்து வழங்கி வரும் அவர், தனது இன்ஸ்டாகிராம் பக்கத்தில் ஆங்கில எழுத்துக்களை (A-Z) உச்சரிக்கும் ஒரு சிறிய வீடியோவைப் பகிர்ந்து இந்த அறிவிப்பை வெளியிட்டார். யூடியூப் தளத்தில் தனது புதிய பயணத்திற்கு ஆதரவளித்த ரசிகர்களுக்கு நன்றி தெரிவித்துள்ள சல்மான் கான், தனது எக்ஸ் (ட்விட்டர்) தளத்தில் இந்த சேனலின் முக்கிய நோக்கம் என்ன என்பது குறித்து நெகிழ்ச்சியுடன் பகிர்ந்துள்ளார்.
யூடியூப் சேனல்
உங்கள் செல்லக் குழந்தைகளுக்கான சேனல்
தனது சமூக வலைதளப் பதிவில் பேசிய சல்மான் கான், "எனது யூடியூப் சேனலைப் பார்த்ததற்கு மிக்க நன்றி. இதில் இடம்பெறும் பதிவுகள் இப்போதைக்கு உங்களுக்கானது அல்ல என்பதை நான் புரிந்துகொள்கிறேன்".
"ஆனால் இது உங்கள் வீட்டில் உள்ள செல்லக் குழந்தைகளுக்கானது என்பதையும் நீங்கள் புரிந்து கொண்டிருப்பீர்கள். குழந்தைகளுக்கான இந்த முயற்சி எப்படிப் போகிறது என்று பார்ப்போம்".
"கொஞ்சம் குறும்புத்தனம் மற்றும் அன்புடன் கூடிய குடும்பச் சூழலோடு குழந்தைகளுக்கு கல்வியும் அவசியம்தானே?" என்று குறிப்பிட்டுள்ளார்.
"முன்னதாகத் தனது சேனலை அறிமுகப்படுத்திய போது, ஆரம்பத்திலிருந்தே ஆரம்பிப்போம். ஏ முதல் இசட் வரை அனைத்தும் இங்கு கிடைக்கும்" என்று அவர் குறிப்பிட்டிருந்தது குறிப்பிடத்தக்கது.
திரைப்படப் பணிகள்
எளிமையான பயோ மற்றும் பிக் பாஸ் பயணம்
சல்மான் கான் தனது யூடியூப் பக்கத்தில் "திரைப்பட நடிகர், கலைஞர், ஓவியர், மனிதநேயவாதி" என எளிமையாகக் குறிப்பிட்டுள்ளார்.
தற்போது பிக் பாஸ் 20-வது சீசனைத் தொகுத்து வழங்கி வரும் அவர், இந்நிகழ்ச்சியைத் தொடர்ந்து 15-வது முறையாக வழிநடத்துகிறார்.
திரைப்படங்களில், அபூர்வா லக்கியா இயக்கத்தில் சித்ராங்கதா சிங்குடன் நடித்துள்ள மாத்ருபூமி திரைப்படம் தயாரிப்பு தாமதங்களுக்குப் பிறகு விரைவில் வெளியாகவுள்ளது.
தொடர்ந்து, வம்சி பைடிபள்ளி இயக்கத்தில் நயன்தாராவுடன் அவர் நடித்துவரும் SVC63 திரைப்படம் 2027 ரம்ஜான் பண்டிகைக்குத் திரைக்கு வர திட்டமிடப்பட்டுள்ளது.
embed
Twitter Post
Thank u for watching my YouTube Channel, I understand that the content is not for u yet but u also get it that it's for your little ones. Let's see how this pans out, thodi si masti ke saath pyaar aur family ke saath education bhi zaruri hai bacchon ke liye. Haina?— Salman Khan (@BeingSalmanKhan) October 10, 2026