அவதார், டைட்டானிக் பட தயாரிப்பாளர் ஜான் லாண்டாவ் காலமானார்
ஹாலிவுட்: டைட்டானிக் மற்றும் அவதார் போன்ற மெகா ஹிட் படங்களை இணைந்து தயாரித்த ஆஸ்கார் விருது பெற்ற தயாரிப்பாளர் ஜான் லாண்டவ் காலமானார். அவருக்கு 63 வயதாகிறது. அவர் இறந்த செய்தியை அவரது குடும்பத்தினர் சனிக்கிழமை ஊடகங்களுக்கு அளித்த அறிக்கையில் பகிர்ந்து கொண்டனர். அவரது இறப்புக்கான காரணம் எதுவும் பகிரப்படவில்லை. டைட்டானிக் மற்றும் அவதார் போன்ற மிக பிரமாண்டமான இரண்டு மிகப்பெரிய வெற்றிப்படங்களில் தன்னுடன் பணியாற்றிய தனது நண்பரும் நெருங்கிய ஒத்துழைப்பாளருமான தயாரிப்பாளர் ஜான் லாண்டவின் இறப்புக்கு இயக்குனர் ஜேம்ஸ் கேமரூன் இரங்கல் தெரிவித்துள்ளார்.
ஜான் லாண்டாவின் மறைவுக்கு அவதார் நாயகி இரங்கல்
"அவர் ஒரு அன்பான நண்பராகவும், 31 வருடங்களாக எனது நெருங்கிய ஒத்துழைப்பாளராகவும் இருந்திருக்கிறார். அவரது இறப்பை கேட்டு என்னில் ஒரு பகுதி உடைந்துவிட்டது." என்று கேமரூன் கூறியதாக அசோசியேட்டட் பிரஸ் தெரிவித்துள்ளது. இதற்கிடையில், அவதார் நாயகி ஜோ சல்தானாவும், சமூக ஊடகங்களில் ஜான் லாண்டவின் இழப்பிற்கு இரங்கல் தெரிவித்துள்ளார். "உங்கள் ஞானமும் ஆதரவும் எங்களில் பலரை வடிவமைத்துள்ளது. அதற்கு நாங்கள் எப்போதும் நன்றியுள்ளவர்களாக இருக்கிறோம். உங்களது வழிகாட்டுதல் எங்களுக்கு ஊக்கமளிப்பதோடு, எங்கள் பயணத்தில் எங்களுக்கு வழிகாட்டும்" என்று அவர் கூறியுள்ளார். ஜான் லாண்டவ் அவரது மனைவி ஜூலி மற்றும் அவர்களது மகன்கள், ஜேமி மற்றும் ஜோடி ஆகியோருடன் வாழ்ந்து வந்தார் என்பது குறிப்பிடத்தக்கது.
