ரஜினியின் கூலி டீஸர்: சன் பிக்ச்சர்ஸ் நிறுவனத்திற்கு இளையராஜா நோட்டீஸ்
செய்தி முன்னோட்டம்
லோகேஷ் கனகராஜ் இயக்கத்தில் ரஜினிகாந்த் நடிக்கும் 'கூலி' திரைப்படத்தின் சமீபத்திய டைட்டில் ரிவீல் வீடியோவிற்கு இளையராஜா கண்டனம் தெரிவித்துள்ளார்.
'கூலி' படத்தின் டைட்டில் டீசரில் தன்னுடைய இசை உரிய அனுமதியின்றி பயன்படுத்தப்பட்டிருப்பதாக அப்படத்தின் தயாரிப்பு நிறுவனமான சன் பிக்சர்ஸ்-க்கு அவர் தற்போது நோட்டீஸ் அனுப்பியுள்ளார்.
லோகேஷ் கனகராஜ் தன்னுடைய படங்களில் பொதுவாக வின்டேஜ் பாடல்களை பயன்படுத்துவது வழக்கம்.
அந்த வகையில் 'கூலி' திரைப்படத்தில், நினைத்தாலே இனிக்கும் திரைப்படத்திலிருந்தும், தங்க மகன் திரைப்படத்திலிருந்தும், எங்க ஊரு பாட்டுக்காரன் உள்ளிட்ட படங்களின் பிரபல பாடல்கள் பயன்படுத்தப்பட்டுள்ளது.
குறிப்பாக, 'டிஸ்கோ' பாடல் டீஸர் முழுவதும் பயன்படுத்தப்பட்டது.
ராயல்டி சர்ச்சை
தொடர்ந்து ராயல்டி சர்ச்சையில் இளையராஜா
கூலி டீசரை மக்கள் கொண்டாடிவரும் நேரத்தில், இந்த இசை தனது அனுமதியின்றி பயன்படுத்தப்பட்டிருப்பதாக சன் பிக்சர்க்ஸ் நிறுவனத்துக்கு இளையராஜா நோட்டீஸ் அனுப்பியுள்ளார்.
குறிப்பாக, 'வா வா பக்கம் வா' பாடலின் அனைத்து விதமான உரிமையும் இளையராஜாவிடமே உள்ளது என்றும், எனவே அந்த பாடலை பயன்படுத்த முறையான அனுமதி பெற வேண்டும், இல்லையெனில் சட்டரீதியாக நடவடிக்கை எடுக்க தங்களுக்கு அனைத்து உரிமைகளும் இருக்கிறது என்றும் இளையராஜா தரப்பு குறிப்பிட்டுள்ளது.
மேலும், லோகேஷ் கனகராஜின் முந்தைய படங்களான 'விக்ரம்', 'ஃபைட் கிளப்' உள்ளிட்ட படங்களிலும் தன்னுடைய இசை, முறையான அனுமதி பெறாமல் பயன்படுத்தப்பட்டிருப்பதாக இளையராஜா அந்த நோட்டீஸில் தெரிவித்துள்ளார்.