ஆசிய நாடுகளுக்கு கச்சா எண்ணெய் விலையைக் குறைத்தது சவுதி அரேபியா: 6 ஆண்டுகளில் இல்லாத சரிவு
செய்தி முன்னோட்டம்
ஆசிய நாடுகளுக்கான தங்களது முதன்மை அரேப் லைட் ரக கச்சா எண்ணெயின் விலையை சவுதி அராம்கோ நிறுவனம் குறைத்துள்ளது. இந்த விலை குறைப்பானது கடந்த 6 ஆண்டுகளில் இல்லாத அளவிற்கு மிகக் குறைந்த அளவாகும். வரும் நவம்பர் மாத விற்பனை விலையில் பீப்பாய்க்கு 5 டாலர் வரை தள்ளுபடி வழங்கிச் சவுதி அரேபியா அதிரடி முடிவை எடுத்துள்ளது. பெர்சிய வளைகுடா நாடுகளுக்கு இடையே ஆசியச் சந்தையைக் கைப்பற்றுவதில் கடும் போட்டி நிலவுவதன் காரணமாகவே சவுதி அரேபியா இந்த முடிவை வெளியிட்டுள்ளது. இந்த விலை குறைப்பு ஆசிய சுத்திகரிப்பு நிறுவனங்களுக்குப் பெரும் நிம்மதியை அளித்துள்ளது.
சந்தை கணிப்புகள்
சந்தை கணிப்புகளைப் பொய்யாக்கிய சவுதி அராம்கோ நடவடிக்கை
வரும் நவம்பர் மாதத்தில் கச்சா எண்ணெய் விலை பீப்பாய்க்கு 5 டாலர் வரை உயரும் என்றே எதிர்பார்க்கப்பட்டது.
சந்தை வர்த்தகர்களின் இந்த எதிர்பார்ப்பைச் சவுதி அராம்கோ நிறுவனம் தற்போது முற்றிலும் பொய்யாக்கியுள்ளது.
திடீரென விலையைக் குறைத்து சர்வதேச சந்தையை வியப்பில் ஆழ்த்தியுள்ளது.
அதேவேளையில் ஐரோப்பிய நாடுகளுக்கான கச்சா எண்ணெய் விலையைப் பீப்பாய்க்கு 3 டாலர் வரை சவுதி உயர்த்தியுள்ளது.
அமெரிக்காவிற்கான விலையில் எவ்வித மாற்றமும் செய்யப்படவில்லை. அமெரிக்காவிற்கு பழைய விலையிலேயே கச்சா எண்ணெய் தொடர்ந்து விநியோகிக்கப்படும் என அறிவிக்கப்பட்டுள்ளது.
ஹார்முஸ் ஜலசந்தி
ஹார்முஸ் ஜலசந்தி போக்குவரத்து மற்றும் மாற்று வழித்தடங்கள்
ஹார்முஸ் ஜலசந்தி பகுதியில் தொடர்ச்சியாகத் தாக்குதல்கள் நடந்து வருகின்றன. இருப்பினும் கடல்வழியாகக் கச்சா எண்ணெய் கொண்டு செல்லப்படுவது மீண்டும் அதிகரித்துள்ளது.
போரின் போது சேதமடைந்த கிழக்கு-மேற்கு குழாய் பாதையைச் சவுதி நிறுவனம் தற்போது சீரமைத்துள்ளது.
இதனால் செங்கடல் வழியாகக் கச்சா எண்ணெய் ஏற்றுமதி செய்யப்படும் அளவு கணிசமாக உயர்ந்துள்ளது.
மத்திய கிழக்கு நாடுகளின் மொத்த எண்ணெய் ஏற்றுமதி போருக்கு முந்தைய நிலையை எட்டியுள்ளது.
இதன் காரணமாக ஆசிய நாடுகளுக்கு கூடுதல் கச்சா எண்ணெய் தடையின்றி கிடைக்க பிரகாசமான வாய்ப்புள்ளது.
வேண்டுகோள்
ஆசிய சுத்திகரிப்பு நிறுவனங்களுக்கு விடுக்கப்பட்டுள்ள வேண்டுகோள்
ஹார்முஸ் ஜலசந்தி பகுதியில் இன்னும் பாதுகாப்பு ஆபத்துகள் நீடித்து வருகின்றன. அதனால் சவுதி அராம்கோ நிறுவனம் ஆசிய நிறுவனங்களுக்கு ஒரு முக்கிய வேண்டுகோள் விடுத்துள்ளது.
பெர்சிய வளைகுடா துறைமுகங்களைத் தவிர்க்க விரும்பினால் மாற்று வழிகளைப் பயன்படுத்தலாம் எனக் கூறியுள்ளது.
இதன்படி யான்பு அல்லது சிடி கெரிர் துறைமுகங்களில் இருந்தும் எண்ணெயைப் பெற்றுக்கொள்ளலாம்.
இதற்கான விருப்பப் பதிவுகளை உடனடியாக சமர்ப்பிக்குமாறு கேட்டுக்கொண்டுள்ளது.
மத்திய கிழக்கில் தொடரும் போர்ப் பதற்றங்களுக்கு மத்தியில் குறைந்த விலையில் எண்ணெய் கிடைப்பது ஆசிய நாடுகளுக்கு சாதகமான அம்சமாகும்.