பாதுகாப்பற்ற தனிநபர் கடன்களுக்கான விதிமுறைகளைக் கடுமையாக்கிய ரிசர்வ் வங்கி
வங்கிகள் மற்றும் வங்கி அல்லாத நிதி நிறுவனங்கள் வழங்கும் பாதுகாப்பற்ற தனிநபர் கடன்கள் மீதான விதிமுறைகளை உயர்த்தி அறிவித்திருக்கிறது ரிசர்வ் வங்கி. அதன்படி பாதுகாப்பற்ற தனிநபர் கடனுக்கான ரிஸ்க் வெயிட்டை 25 புள்ளிகள் வரை உயர்த்தி 125 புள்ளிகளாக உயர்த்தியிருப்பதாக அறிவித்திருக்கிறது ரிசர்வ் வங்கி. இந்த விதிமுறையானது பாதுகாப்பற்ற முறையில் வழங்கப்படும் கடன்களுக்கு மட்டுமே பொருந்தும் எனவும், வீட்டுக் கடன், கல்விக் கடன் மற்றும் வாகனக் கடன் உள்ளிட்ட சில வகையான நுகர்வோர் கடன்களுக்குப் பொருந்தாது எனவும் குறிப்பிடப்பட்டிருக்கிறது. மேலும், தங்கம் மற்றும் தங்க நகைகளுக்கு ஈடாகக் கொடுக்கப்படும் கடன்களுக்கும் மேற்கூறிய விதிமுறை பொருந்தாது என அறிவித்திருக்கிறது ரிசர்வ். அந்த கடன்களுக்கான ரிஸ்க் வெயிட்டானது 100 சதவிகிதமாகவே இருக்கும் என அறிவிக்கப்பட்டுள்ளது.
கடன்களுக்கான ரிஸ்க் வெயிட்டை அதிகரிப்பதால் என்ன நடக்கும்?
குறிப்பிட்ட கடன்களுக்கான ரிஸ்க் வெளியிட்டை அதிகரிக்கும் பட்சத்தில், வங்கிகள் மற்றும் வங்கி அல்லாத பிற நிதி நிறுவனங்கள் அந்தக் கடன்களை வழங்குவது கட்டுப்படுத்தப்படும். மேலும், வங்கிகள் வழங்கியிருக்கும் நுகர்வோர் கடன் வரவுகள் மீதான ரிஸ்க் வெயிட்டை, 25 புள்ளிகள் அதிகரித்து 125 சதவிகிதமாகவும், வங்கி அல்லாத நிதி நிறுவனங்களின் நுகர்வோர் கடன் வரவுகள் மீதான ரிஸ்க் வெயிட்டை, 25 புள்ளிகள் உயர்த்தி 150 சதவிகிதமாகவும் உயர்த்தியிருக்கிறது ரிசர்வ் வங்கி. அனைத்து நிதி நிறுவனங்களும் கடன்கள் மீதான கண்காணிப்பு நெறிமுறைகளை பலப்படுத்த தன்னிச்சையான நடவடிக்கைகள் எடுக்க வேண்டும் என ரிசர்வ் வங்கி ஆளுநர் சக்தி காந்த தாஸ் அறிவுறுத்தியிருப்பது குறிப்பிடத்தக்கது.
