சுவிட்சர்லாந்து ஜிடிபியையே மிஞ்சிய இந்திய கோடீஸ்வரர்கள்! ₹187.5 லட்சம் கோடி சொத்து; ஹுருன் அறிக்கையில் தகவல்
செய்தி முன்னோட்டம்
சமீபத்தில் வெளியிடப்பட்ட எம்3எம் ஹுருன் இந்தியா பணக்காரர்கள் பட்டியல் 2026 அறிக்கையின்படி, இந்தியாவின் முன்னணி 1,810 கோடீஸ்வரர்களின் கூட்டு சொத்து மதிப்பு ₹187.5 லட்சம் கோடியை ($1.96 டிரில்லியன்) எட்டியுள்ளது. இந்தத் தொகை, சுவிட்சர்லாந்து ($1.15 டிரில்லியன்), சிங்கப்பூர் ($0.66 டிரில்லியன்) மற்றும் துருக்கி ($1.64 டிரில்லியன்) போன்ற நாடுகளின் மொத்த உள்நாட்டு உற்பத்தியை (ஜிடிபி) விட பல மடங்கு அதிகமாகும். கூடுதல் விபரங்கள் இங்கே:-
தொழிற்துறைகள்
சொத்து உருவாக்கத்திற்கு வித்திட்ட முக்கியத் தொழிற்துறைகள்
இந்தியாவில் பணக்காரர்களின் எண்ணிக்கை கணிசமாக உயர உற்பத்தித் துறை, பாதுகாப்புத் துறை, பசுமை ஆற்றல், மருந்து உற்பத்தி மற்றும் செயற்கை நுண்ணறிவு (ஏஐ) ஆகிய துறைகளே முக்கியக் காரணங்களாக அமைந்துள்ளன.
தொழிற்துறை சார்ந்த தயாரிப்புகள் மூலம் மட்டுமே இந்த ஆண்டு 44 புதிய தொழிலதிபர்கள் பணக்காரர்கள் பட்டியலில் இணைந்துள்ளனர்.
மேலும், பெருநகரங்கள் மட்டுமின்றி பாகல்கோட், சோலான், மிர்சாபூர் போன்ற 106 சிறிய நகரங்களிலிருந்தும் புதிய தொழில்முனைவோர்கள் உருவாகி வருகின்றனர்.
சராசரி வருமானம்
சராசரி இந்தியர்களின் வருமானமும் பொருளாதார இடைவெளியும்
கோடீஸ்வரர்களின் சொத்து மதிப்பு பன்மடங்கு உயர்ந்தாலும், இது சராசரி இந்தியர்களின் பொருளாதார நிலையைப் பிரதிபலிக்கவில்லை என ஹுருன் இந்தியாவின் முதன்மை ஆய்வாளர் அனாஸ் ரஹ்மான் ஜுனைத் தெரிவித்துள்ளார்.
சர்வதேச நாணய நிதியத்தின் (IMF) கூற்றுப்படி, சிங்கப்பூரின் தனிநபர் ஜிடிபி $1,07,760 ஆக இருக்கும் வேளையில், இந்தியாவின் தனிநபர் ஜிடிபி $2,813 மட்டுமே உள்ளது.
மேலும், கோடீஸ்வரர்களின் ₹187.5 லட்சம் கோடி என்பது வங்கியில் உள்ள ரொக்கம் அல்ல, மாறாகப் பல்வேறு நிறுவனங்களில் உள்ள பங்குகளின் மதிப்பாகும்.
பொருளாதார சவால்
வேலைவாய்ப்புகளும் எதிர்கால பொருளாதார சவால்களும்
இந்தியக் கோடீஸ்வரர்களின் இந்த பிரம்மாண்ட சொத்து உருவாக்கம், நாட்டின் அடித்தட்டு மக்களுக்கு எந்த அளவிற்கு புதிய வேலைவாய்ப்புகளையும், உயர்ந்த வருமானத்தையும் உருவாக்கித் தருகிறது என்பதே உண்மையான பொருளாதார வளர்ச்சியின் அளவுகோலாகும்.
வீட்டு உபயோகப் பொருட்கள் சார்ந்த துறைகளில் சொத்து மதிப்பு சற்று சரிந்துள்ள நிலையில், தொழிற்துறை வளர்ச்சி நாட்டின் அனைத்துத் தரப்பு மக்களுக்கும் பரவலான வேலைவாய்ப்புகளாக மாற வேண்டும் என்பதே பொருளாதார வல்லுநர்களின் கருத்தாக உள்ளது.