தங்கம் இறக்குமதி வரி 15% ஆக அதிகரிப்பு: யார் பாதிக்கப்படுவார்கள்?

எழுதியவர் Venkatalakshmi V

May 13, 2026

11:34 am

செய்தி முன்னோட்டம்

ஈரான் போர் மற்றும் உலகளாவிய பொருளாதார நெருக்கடிக்கு மத்தியில், இந்தியாவின் அந்நியச் செலாவணி கையிருப்பை (Forex Reserves) பாதுகாக்கும் நோக்கில் மத்திய அரசு தங்கம் மற்றும் வெள்ளி மீதான இறக்குமதி வரியை அதிரடியாக உயர்த்தியுள்ளது. மே 13 முதல் அமலுக்கு வந்துள்ள இந்த மாற்றங்கள் குறித்து விரிவாகப் பார்க்கலாம். மத்திய நிதியமைச்சகத்தின் புதிய அறிவிக்கையின் (Customs Notification No. 16/2026) படி, தங்கம் மற்றும் வெள்ளி மீதான ஒட்டுமொத்த இறக்குமதி வரி 6 சதவீதத்திலிருந்து 15 சதவீதமாக உயர்த்தப்பட்டுள்ளது.

மாற்றம்

விலையில் ஏற்படும் மாற்றம் (உதாரணம்)

தற்போது 24 கேரட் தங்கம் 10 கிராம் சுமார் ₹1,54,750 (மே 13 நிலவரப்படி) என கணக்கிட்டால், வரி உயர்வால் ஏற்படும் மாற்றம் பின்வருமாறு: பழைய வரி முறையில்: வரியுடன் சேர்த்து அதன் மதிப்பு சுமார் ₹1,64,035. புதிய வரி முறையில்: வரியுடன் சேர்த்து அதன் மதிப்பு சுமார் ₹1,77,962. (குறிப்பு: இது 3% ஜிஎஸ்டி மற்றும் செய்கூலி சேராத விலை ஆகும்.)

முடிவு

அரசு ஏன் இந்த முடிவை எடுத்தது?

1. அந்நியச் செலாவணி பாதுகாப்பு: இந்தியா தனது தங்கத் தேவையை முற்றிலும் இறக்குமதி மூலமே ஈடு செய்கிறது. 2025-26-ல் மட்டும் $71.98 பில்லியன் மதிப்பிலான தங்கம் இறக்குமதி செய்யப்பட்டுள்ளது. வரியை உயர்த்துவதன் மூலம் இறக்குமதியைக் குறைத்து, டாலர் வெளியேற்றத்தைத் தடுக்க அரசு முயல்கிறது. 2. பொருளாதார ஸ்திரத்தன்மை: ஈரானியப் போரால் கச்சா எண்ணெய் விலை உயர்ந்துள்ள நிலையில், அத்தியாவசியத் தேவையான எண்ணெய்க்கு டாலர்களைச் சேமிக்க தங்கம் வாங்குவதைக் குறைக்க அரசு அழுத்தம் கொடுக்கிறது. 3. மறுசுழற்சிக்கு ஊக்கம்: புதிய தங்கத்தை இறக்குமதி செய்வதற்குப் பதிலாக, பழைய தங்கத்தை உருக்கிப் பயன்படுத்துவதையும் (Recycling), இதர உதிரிபாகங்கள் மீட்பையும் ஊக்குவிக்கக் குறைந்தபட்ச வரிச் சலுகைகள் அறிவிக்கப்பட்டுள்ளன.

தாக்கம்

நுகர்வோர் மற்றும் வர்த்தகர்கள் மீதான தாக்கம்

நகை விலையில் உடனடி உயர்வு: வரி உயர்வால் சில்லறை விற்பனை விலையில் உடனடி ஏற்றம் இருக்கும். முதலீட்டு மாற்றம்: முதலீட்டாளர்கள் டிஜிட்டல் தங்கம் (Digital Gold) அல்லது தங்க இடிஎஃப் (Gold ETF) பக்கமாகத் திரும்ப வாய்ப்புள்ளது. கடத்தல் அபாயம்: இறக்குமதி வரி உயரும்போது, அண்டை நாடுகளிலிருந்து தங்கம் கடத்தப்படுவது அதிகரிக்க வாய்ப்புள்ளதாக நகை வர்த்தகர்கள் எச்சரிக்கின்றனர். பிரதமர் மோடி ஏற்கனவே ஒரு வருடத்திற்குத் தங்கம் வாங்குவதைத் தவிர்க்குமாறு வேண்டுகோள் விடுத்திருந்த நிலையில், தற்போது இந்த வரி உயர்வு ஒரு 'நிதிக் தடையை' (Fiscal Barrier) ஏற்படுத்தியுள்ளது. இது நடுத்தர வர்க்கத்தினரின் திருமணத் திட்டங்கள் மற்றும் சேமிப்பு பழக்கத்தில் பெரிய மாற்றத்தை ஏற்படுத்தும் என எதிர்பார்க்கப்படுகிறது.