வருமான வரி தாக்கல் செய்ய கூடுதல் அவகாசம்! நவம்பர் 21 வரை கெடு நீட்டிப்பு; யார் கவனத்தில் கொள்ளவேண்டும்?
செய்தி முன்னோட்டம்
2026-27 மதிப்பீட்டு ஆண்டிற்கான வருமான வரி அறிக்கையைத் (ஐடிஆர்) தாக்கல் செய்யக் காத்திருந்த குறிப்பிட்ட பிரிவினருக்கு மத்திய நேரடி வரிகள் வாரியம் (CBDT) மிகப்பெரிய நிவாரண செய்தியை வெளியிட்டுள்ளது. தங்களது கணக்குகளை சட்டப்பூர்வமாகத் தணிக்கை செய்ய வேண்டிய கட்டாயத்தில் உள்ள வரி செலுத்துவோருக்கு, அக்டோபர் 31, 2026 ஆக இருந்த ஐடிஆர் தாக்கல் காலக்கெடுவை வரும் நவம்பர் 21, 2026 வரை நீட்டித்து அதிகாரப்பூர்வமாக உத்தரவிட்டுள்ளது. இது தொடர்பாக வருமான வரிச் சட்டம் 1961, பிரிவு 139-ன் கீழ் விரிவான சுற்றறிக்கை மத்திய நேரடி வரிகள் வாரியத்தின் எக்ஸ் பக்கத்தில் வெளியிடப்பட்டுள்ளது. கூடுதல் விபரங்கள் இங்கே:-
புதிய காலக்கெடு
தணிக்கை அறிக்கை சமர்ப்பிப்பதற்கான புதிய காலக்கெடு விவரங்கள்
ஐடிஆர் தாக்கல் செய்வதற்கான காலக்கெடு மட்டுமின்றி, அதற்கு முன்னதாக சமர்ப்பிக்கப்பட வேண்டிய வரித் தணிக்கை அறிக்கைகளுக்கான கடைசித் தேதியும் நீட்டிக்கப்பட்டுள்ளது.
முன்னதாகச் செப்டம்பர் 30, 2026 ஆக நிர்ணயிக்கப்பட்டிருந்த தணிக்கை அறிக்கை தாக்கல் தேதி, தற்போது அக்டோபர் 21, 2026 வரை தள்ளிவைக்கப்பட்டுள்ளது.
இதன் மூலம் வரி செலுத்துவோரும் அவர்களின் பட்டயக் கணக்காளர்களும் தணிக்கை நடைமுறைகளை எவ்விதப் பதற்றமுமின்றி சீராக நிறைவு செய்து, சரியான தகவல்களுடன் கூடிய அறிக்கையைத் தாக்கல் செய்யப் போதுமான அவகாசம் கிடைத்துள்ளது.
யாருக்குப் பொருந்தும்?
காலக்கெடு நீட்டிப்பு யாருக்கெல்லாம் பொருந்தும்? அதன் பின்னணி என்ன?
இந்தச் சலுகையானது வருமான வரிச் சட்டத்தின்படி தங்களது கணக்குகளைத் தணிக்கை செய்ய வேண்டிய கார்ப்பரேட் நிறுவனங்கள், பிற வணிக அமைப்புகள் மற்றும் தணிக்கைக்கு உட்படுத்தப்படும் நிறுவனங்களின் கூட்டாளர்களுக்கு மட்டுமே பொருந்தும்.
தணிக்கைக் காலத்தில் கணக்குப் புத்தகங்களை ஜிஎஸ்டி அறிக்கைகள், டிடிஎஸ்/டிசிஎஸ் பதிவுகள், ஏஐஎஸ், டிஐஎஸ் மற்றும் வங்கிப் பரிவர்த்தனை தகவல்களோடு ஒப்பிட்டு சரிபார்க்க கூடுதல் அவகாசம் தேவைப்பட்டது.
மேலும், வங்கி ஊழியர்களின் வேலைநிறுத்த போராட்ட அறிவிப்பு உள்ளிட்ட நடைமுறை சிக்கல்களைக் கருத்தில் கொண்டே மத்திய நேரடி வரிகள் வாரியம் இந்த முடிவை எடுத்துள்ளது.
சிறப்பு விதிகள்
பன்னாட்டு நிறுவனங்களுக்கான சிறப்பு விதிகள் மற்றும் தனிநபர் வரி செலுத்துவோர் நிலை
இந்தியாவில் இயங்கி வரும் பன்னாட்டு நிறுவனங்கள் மற்றும் சர்வதேச பரிவர்த்தனைகள் அல்லது குறிப்பிட்ட உள்நாட்டுப் பரிவர்த்தனைகளை மேற்கொண்டு பிரிவு 92E-ன் கீழ் வரும் நிறுவனங்களுக்கு வழக்கமான நவம்பர் 30, 2026 வரையிலான காலக்கெடுவே நீடிக்கும்.
அவர்கள் தங்களது தணிக்கை அறிக்கை மற்றும் படிவம் 3CEB ஆகியவற்றை அக்டோபர் 31-க்குள் சமர்ப்பிக்க வேண்டும்.
அதேவேளையில், வழக்கமான தனிநபர் அல்லது சம்பளப் பிரிவு வரி செலுத்துவோருக்கான அவகாசம் ஏற்கனவே முடிவடைந்துவிட்டதால், அவர்கள் இச்சலுகையை பயன்படுத்த முடியாது என்பது குறிப்பிடத்தக்கது.