இந்தாண்டு இறுதிக்குள்ளேயே இந்தியா- பிரிட்டன் இடையிலான FTA கையெழுத்தாக வாய்ப்பு
செய்தி முன்னோட்டம்
இந்தியா மற்றும் பிரிட்டன் ஆகிய நாடுகளுக்கு இடையேயான சுதந்திர வர்த்தக ஒப்பந்தமானது (FTA) இந்த ஆண்டு இறுதிக்கு முன்பே கையெழுத்தாக வாய்ப்புகள் இருப்பதாக மத்திய வர்த்தக அமைச்சகத்தைச் சேர்ந்த அதிகாரி ஒருவர் தெரிவித்திருக்கிறார்.
பிரிட்டனுடன் சுதந்திர வர்த்தக ஒப்பந்தத்தை மேற்கொள்வதற்கான பேச்சு வார்த்தையில் ஈடுபட்டிருக்கிறது இந்தியா. இந்தப் பேச்சுவார்த்தையின் பெரும்பாலான பகுதிகளில் இரு நாடுகளுக்குமிடையே ஒருமித்த கருத்தே நிலவுவதாகத் தெரிவிக்கப்பட்டுள்ளது.
எனவே, எவ்வளவு விரைவாக முடியுமோ, அவ்வளவு விரைவாக இந்த சுதந்திர வர்த்தக ஒப்பந்தத்தை இறுதி செய்ய முயற்சித்து வருவதாகத் தெரிவித்திருக்கிறார் மத்திய வர்த்தக அமைச்சக செயலாளர் சுனில் பர்த்வால்.
மேலும், இரு நாடுகளுக்குமிடையே சர்ச்சைக்குரிய வகையில் கருதப்படும் விஷயங்களில் நடத்தப்பட்ட பேச்சுவார்த்தையானது சுமுகமான முடிவை எட்டியிருப்பதாகவும் தெரிவித்திருக்கிறார் அவர்.
வணிகம்
இந்த FTA-வினால் இரு நாடுகளுக்கும் என்ன லாபம்?
கடந்தாண்டு ஆஸ்திரேலியாவுடன் மேற்கொள்ளப்பட்ட இடைக்கால சுதந்திர வர்த்தக ஒப்பந்தத்தைக் கடந்து, இந்தியாவிற்கு பிரிட்டனுடனான இந்த ஒப்பந்தமே, வளர்ந்த நாடுகளுடன் மேற்கொள்ளப்படவிருக்கும் முதல் சுதந்திர வர்த்தக ஒப்பந்தமாகும்.
பிரிட்டனோ, கடந்த 2020-ம் ஆண்டு ஐரோப்பிய ஒன்றியத்திலிருந்து வெளியேறிய பிறகு, உலக நாடுகளுடனான வர்த்தக தொடர்புகளை பரவலாக்குவதில் இந்தியாவுடனான இந்த சுதந்திர வர்த்தக ஒப்பந்தம் முக்கிய பங்கு வகிக்கிறது.
பிரிட்டனுடனான இந்த சுதந்திர வர்த்தக ஒப்பந்தத்தின் மூலம், ஏற்றுமதிகளை அதிகரிக்க நம்பிக்கை கொண்டிருக்கிறது இந்தியா.
பிரிட்டனுக்கு, இந்த ஒப்பந்தத்தின் மூலம் தங்கள் நாட்டில் தயாரிக்கப்படும் மதுபானங்கள், ப்ரீமியம் கார்கள் மற்றும் சட்டப்பூர்வமான சேவைகளை வழங்குவதற்கு இந்தியாவில் இன்னும் எளிதான சூழ்நிலை உருவாகும் என எதிர்பார்க்கிறது.