பட்ஜெட்டுக்கு பிறகு ரூ.10,000 கோடி வெளிநாட்டு முதலீட்டை இழந்தது இந்திய பங்குச்சந்தை
யூனியன் பட்ஜெட் அறிவிக்கப்பட்ட மூன்று நாட்களில் வெளிநாட்டு போர்ட்ஃபோலியோ முதலீட்டாளர்கள் (FPIs) இந்திய பங்குச் சந்தையில் இருந்து கிட்டத்தட்ட ரூ.10,710 கோடியை எடுத்துள்ளனர். இந்த வருட பட்ஜெட்டில், டெரிவேட்டிவ் வர்த்தகங்கள் மற்றும் பங்கு முதலீடுகளின் மூலதன ஆதாயங்கள் மீதான வரிகளை அரசாங்கம் உயர்த்தியது என்பது குறிப்பிடத்தக்கது. இதனால், ரூ.10,000 கோடி வெளிநாட்டு முதலீட்டை இந்திய பங்குச்சந்தைகள் இழந்துள்ளன. பங்குச் சந்தை தரவுகளின்படி, FPIகள் ஜூலை 23 அன்று ரூ.2,975 கோடி மதிப்புள்ள பங்குகளையும், ஜூலை 24 அன்று ரூ.5,130 கோடி மதிப்புள்ள பங்குகளையும், ஜூலை 25-ம் தேதி ரூ.2,605 கோடி மதிப்புள்ள பங்குகளையும் விற்றுள்ளன.
உள்நாட்டு நிறுவன முதலீடு உயர்ந்தது
அதே நேரத்தில், உள்நாட்டு நிறுவன முதலீட்டாளர்கள் ஜூலை 23 முதல் சுமார் ரூ.6,900 கோடி மதிப்புள்ள பங்குகளை வாங்கியுள்ளனர். பட்ஜெட்டுக்கு முன்னதாக, ஜூலை 12 மற்றும் ஜூலை 22 க்கு இடையில் FPIகள் சுமார் ரூ.18,000 கோடி மதிப்புள்ள பங்குகளை வாங்கினர். பட்ஜெட்டில் முதலீட்டாளர்களுக்கு சாதகமாக ஏதாவது அறிவிக்கப்படும் என்ற எதிர்பார்ப்பில் நிறைய முதலீடுகள் செய்யப்பட்டன. இந்த பட்ஜெட்டில், நிர்மலா சீதாராமன் மூலதன ஆதாய வரி தொடர்பான முக்கிய அறிவிப்புகளை வெளியிட்டார். நீண்ட கால மூலதன ஆதாயங்கள் மீதான வரி விகிதம் (எல்டிசிஜி) அனைத்து வகையான சொத்துக்களுக்கும் 12.5 சதவீதமாக மாற்றப்படும் என்று அறிவிக்கப்பட்டது. வெளிநாட்டு முதலீட்டாளர்கள் மற்றும் உள்நாட்டு முதலீட்டாளர்கள் என்று அனைவருக்குமே இது பொருந்தும்
